xubir: v. Dir [d’un sitiu, d’un puestu más baxu a otru más altu]. t. prnl. Xubió al poste y mancóse. Xubió de categoría. 2 Facer dir [d’un sitiu más baxu a otru más altu]. Xubiólu de categoría. 3 Andar p’arriba [per un camín, per una escalera]. Xube les cuestes mui rápido pa lo vieyu que ye. 4 Poner derechu, en posición vertical [el cuerpu o una parte d’él]. Él xubió la cabeza. 5 Poner [nun coche, nuna caballería]. Xubiólu al coche. 6 Ponese [nun coche, nuna caballería]. t. prnl. Xúbime a la noria. Xubí al caballu. 7 Facer mayor [la intensidá, la cantidá, l’ánimu, el preciu]. Xubi un poco la voz, que nun s’oye. 8 Llegar [hasta una cantidá, una temperatura, una intensidá, un preciu]. La obra xube a dos millones. 9 Llevantar, construyir [una casa, una muria]. Xubieron la casa en pocu tiempu. 10 Acurtiar per baxo [una prenda de vistir, una cortina, una parte d’una prenda de vistir]. Hai que xubir un poco la manga, quédate llarga. || Tener los fumos xubíos, fam. ponese arguyosu, enchipáu. || Xubir al cielu, fam. morrer. || Xubir los colores, poner coloráu [pola vergüenza, pola sorpresa]. || Xubise a la cabeza, fam. producir [a daquién] una actitú soberbiosa, d’enchipamientu. 2 Enfilar, emborrachar [el vinu, la coñá]. || Xubise a les barbes de [daquién], fam. remontase, enfarrucase con [daquién]. || Xubise la sangre a la cabeza, fam. entrar [a daquién] un gran alteriamientu nel ánimu por enfadu, por indignación. || Xubise los fumos [a daquién], fam. producir [a daquién] una actitú soberbiosa, d’enchipamientu. || Xubise peles paredes, fam. enfadase muncho.