pelo, el: sust. Conxuntu de los pelos [que tien una persona, un animal en cuerpu o nuna parte del cuerpu]. 2 Conxuntu de los pelos [que tien una persona na cabeza]. 3 Capa [blanca de fungu que cría la materia orgánico al apodrecer]. 4 Filo [fino y curtio que sal en dalgunes frutes, na fueya de delles plantes]. 5 Filo [que sobresal nun texíu]. 6 Yerba [d’un prau]. 7 fam. Aspeutu, apariencia [bona o mala que tien una persona, un asuntu]. || A pelo, moyándose, ensin paragües. 2 Cola cabeza al aire. 3 Ensin siella, ensin albarda [montar una caballería]. 4 Cobrando sólo’l xornal. 5 Ensin preparación, ensin tenelo ensayao [facer daqué]. 6 Ensin proteición, ensin sofitu. || A pelo gochu, fam. moyándose, ensin paragües. 2 Cola cabeza al aire. 3 Ensin siella, ensin albarda [montar una caballería]. 4 Cobrando sólo’l xornal. 5 Ensin preparación, ensin tenelo ensayao [facer daqué]. 6 Ensin proteición, ensin sofitu. || Cayer al pelo [daqué a daquién], fam. pasar [daqué a daquién por tenelo merecío]. || Cayer el pelo [a daquién], fam. pasar [a ún] dalgo grave [por facer daqué, por dicir daqué que nun convenía]. || Colgar del pelo [a ún], fam. pasar daqué [a daquién por tenelo merecío]. 2 Tener interés pa [daquién dalguna cosa, dalguna persona]. Eso failo apriesa porque-y cuelga bien del pelo. || Dar pal pelo, fam. pegar [a daquién]. || Echar el pelo, fam. ameyorar, prosperar. || Echar pelo [daquién], fam. pagar les consecuencies [por daqué que se fizo mal]. Enteróse to pá y agora vas echar pelo. 2 Cansar [de facer daqué]. || En pelo del demoniu, fam. mui apriesa. || En pelo del diablu, fam. mui apriesa. || En pelo del diantre, fam. mui apriesa. || Pelo de llobu, [tipu de] mofu [que se cría nel tueru d’un árbol]. || Pelo sanxuaniego, yerba [que se siega per San Xuan]. || Poner al pelo l’agua, enguadar, echar restos de pexe [a los pexes p’atrayelos y poder pescalos]. || Poner en pelo al agua, enguadar, echar restos de pexe [a los pexes p’atrayelos y poder pescalos]. || Soltar el pelo, fam. ameyorar, prosperar. || Tirar del pelo, fam. importar [daqué o daquién]. || Tirar el pelo, fam. ameyorar, prosperar. || Tomar el pelo [a daquién], engañar [a daquién]. 2 Facer burlla de [daquién]. || Volvese la manta pelo [a daquién], fam. salir mal un plan, un proyeutu [a daquién].