meter: v. Poner [dientro de daqué o ente delles coses]. Metió les llaves en caxón. 2 Facer que [daqué o daquién] tea [nun estáu, nun sitiu], qu’intervenga [nuna situación, nuna actividá]. Metiéronlu na cárcel. Nun sé onde metí les llaves. Metió l’agua en casa va poco. 3 Dexar [dineru nun bancu pa pagar daqué, pa que produza intereses]. Metí tres millones nesa cuenta. 4 Invertir [una cantidá de dineru en daqué]. Metieron cien mil pesetes nel negociu y nun-yos salió bien.5 Usar [una ferramienta, un cuchiellu pa facer daqué]. Metí tixera y acabé’l traxe llueu. 6 Acurtiar parte de [una prenda de vistir], de [una cortina]. Metió al pantalón que-y quedaba llargu. 7 Facer que [daquién] aguante, acepte de mala gana [una cosa, a una persona]. Metiéronme una fruta malísimo. 8 Pegar, dar [golpes]. Metí-y dos moquetaes y quedó tan tranquilu. 9 Emburriar. Metió-y a la puerta y nun abrió. 10 Dicir [una mentira]. Mete unes mentires como puños. 11 Producir, facer qu’esista [ruíu, enemistá]. Nun quier la máquina porque mete munchu ruíu. 12 Facer [que daquién tenga un estáu d’ánimu determináu]. Metió-y mieu. 13 Poner [un güeyu, un pie nuna posición incorreuta al mirar, al andar]. 14 Aicionar [una marcha, el frenu d’una máquina]. Arranques y metes la primera. 15 Facer [goles, tantos]. Metieron tres goles. 16 prnl. Dedicase [a una profesión determinada]. Metióse a monxa. 17 prnl. Ponese [a facer daqué]. Aborrezo meteme a facelo porque nun sé bien. 18 prnl. Acercase [muncho] a [daqué o daquién]. Nun te metas pela televisión tanto. 19 prnl. Pasase de [un puntu determináu]. Nun te metas p’allá alantre que ye peligroso. 20 prnl. Provocar a [daquién], facer [lo posible pa qu’una persona rabie, pa que s’escite, pa que s’engarrie]. Ta tol día metiéndose col primu. 21 prnl. Tar [nun sitiu], dir a parar a [un sitiu]. ¿Ónde se metería esti neñu? 22 prnl. Apaecer y espardese [l’agua, la borrina]. 23 prnl. Apegase, sentir munchu cariñu, afeutu por [daquién]. Tola vida se metió muncho pela madre. 24 prnl. Desapaecer [un astru del cielu]. La lluna metióse tres del cordal. || A tou meter, fam. con tola potencia que ye a desendolcar [un aparatu]. 2 A muncha velocidá, mui apriesa. 3 Con tol esfuerciu. || Metela, fam. tener rellaciones sexuales el machu cola fema. || Meter a la parte, facer [que daquién intervenga nun asuntu, nun negociu]. || Meter a triyu, axustar a unes normes el comportamientu de [daquién]. || Meter baza, fam. participar [nun asuntu, nuna conversación]. || Meter carueca, ilusionar [con mentires, con imposibles]. || Meter el cazu, fam. metese [n’asuntos ayenos]. || Meter el cuezu, fam. equivocase. 2 Metese [n’asuntos ayenos]. || Meter el diente a [daqué], fam. entamar a facer [daqué]. || Meter el focicu, fam. caciplar, metese [n’asuntos ayenos]. || Meter el rabu ente les pates, fam. avergonzase. 2 Dexar d’intervenir en daqué [por vergüenza]. 3 Aceptar daqué que nun gusta, que nun se quier [nuna reña, nun discutiniu]. || Meter el remu, caciplar, metese [n’asuntos ayenos]. || Meter empeños, recomendar [a daquién pa un negociu, pa un trabayu]. || Meter empeñu, recomendar [a daquién pa un negociu, pa un trabayu]. || Meter en bolsu a [daquién], ganar la confianza, la simpatía de [daquién]. || Meter en breda a [daquién], axustar a unes normes el comportamientu de [daquién]. || Meter en cintura a [daquién], axustar a unes normes el comportamientu de [daquién]. || Meter en culu, fam. *espresión cola que se desprecia daqué. || Meter en danza [a daquién], facer participar [a daquién] nun asuntu. || Meter en vares a [daquién], axustar a unes normes el comportamientu de [daquién]. || Meter fueu, encender, prender fueu. || Meter la cabeza, fam. llograr asitiase, facese sitiu. || Meter la cabeza ente les piernes, fam. dexar d’intervenir en daqué [por vergüenza]. || Meter la caciplada, fam. metese [n’asuntos ayenos]. || Meter la caza, fam. equivocase. 2 Metese [n’asuntos ayenos]. || Meter la cazuña, fam. equivocase. 2 Metese [n’asuntos ayenos]. || Meter la gocha, facer una pareya de mayadores más ruíu qu’otra. || Meter la llingua en culu, fam. callar [por ser inconveniente falar d’un asuntu]. || Meter la pata (hasta’l cuezu), fam. equivocase. 2 Metese [n’asuntos ayenos]. || Meter l’agua en casa, fam. facer perder en terrenu propiu. || Meter les cabres en corral [a daquién], fam. dicir [a daquién] de manera firme y clara coses que lu dexen ensin argumentos, que lu faen cambiar d’actitú. || Meter les narices (onde naide lu llama), fam. metese [n’asuntos ayenos]. || Meter los bigotes, fam. metese [n’asuntos ayenos]. || Meter mano a [daqué, a daquién], fam. empezar a trabayar, a arreglar [daqué]. 2 Tocar les partes íntimes de [daquién con intenciones sexuales]. 3 Castigar [a daquién aplicando la llei]. || Meter mecha, fam. apurar [nun trabayu]. || Meter mieu, ser estraordinariu, fuera de lo común [una persona, un asuntu]. || Meter na cabeza, entender o facer entender. 2 Encamentar. || Meter pelos güeyos, facer que [daquién] acepte [daqué] de mala gana. 2 Facer que [daquién] tenga gana de [daqué]. || Meter pina, fam. facer [lo posible pa que persones o animales s’engarrien, s’enfaden]. || Meter tixera, censurar [un llibru, una película]. || Metese de cabeza, fam. participar [en daqué]. || Metese en camisa d’once vares, fam. participar nun asuntu complicáu, nuna discusión [que nun correspuende a ún]. || Metese en fariña, fam. tratar direutamente un asuntu. || Metese en mediu, intervenir [nun asuntu p’arreglalu o pa meter cisma]. || Metese en sí, apartar l’atención d’alredor pa concentrase nos propios pensamientos. || Metese na cabeza [daqué], obsesionar [a daquién una idea]. || Metese na cueva (de) l’osu, fam. participar nun asuntu peligrosu, complicáu. || Metese na fornica, fam. tar muncho en casa ensin salir a la calle. || Metese n’agua, llover muncho y bastante tiempu. || Metese per (el) mediu, intervenir [nun asuntu p’arreglalu o pa meter cisma]. 2 Metese [n’asuntos ayenos]. 3 Torgar, impidir [facer daqué].