güevu, el: sust. Célula [que queda d’axuntase un gametu masculín y otru femenín y qu’al fecundar da orixe a un ser de la mesma especie]. 2 Cuerpu [arredondiáu y con una cubierta dura, producíu pola fema de les aves, qu’al fecundar da orixe a un ser de la mesma especie]. 3 Escala, piedra [con un furacu en mediu onde xira otra piedra que ta asitiada nel cabu inferior del fusu del molín]. 4 Bultu [en pelleyu, nuna superficie]. 5 fam. Testículu. 6 pl. fam. Arremangu, valor [pa facer les coses]. 7 pl. fam. Calma desaxerada. || A (puru) güevu, fam. a la fuercia, inevitablemente. 2 Ensin nenguna xustificación. 3 Ensin ayuda, coles propies fuercies. || Cortar los güevos [a daquién], fam. frenar o parar [a daquién] nes sos intenciones. || De güevu (revueltu), fam. nerviosu, alteriáu. 2 Contentu, chancieru. 3 Repunante, de mal humor. || De (los) güevos, fam. *espresión que-y da intensidá a un axetivu o un sustantivu. || Echar güevos [a daqué], fam. tener valor [pa facer daqué]. || Esti güevu sal quier, fam. *espresión que s’emplega pa indicar que daquién fai daqué buscando’l porgüeyu. || Güevos pintos, fiesta que se celebra’l primer martes dempués del domingu de Pascua. || Güevu en camisa, güevu ensin cáscara. || Güevu pintu, güevu [cocíu y decoráu na cáscara, típicu de la fiesta del primer martes dempués del domingu de Pascua]. || Hasta los güevos, fam. mui cansáu o fartu [de daqué o daquién]. || Llámbite que tas de güevu, *espresión que se diz cuando se xulguen los deseos de daquién poco reales, cuando presume muncho. || Llímpiate que tas de güevu, *espresión que se diz cuando se xulguen los deseos de daquién poco reales, cuando presume muncho. || Nun poner un güevu en casa, fam. andar siempre fuera de casa. || Paecese como un güevu a otru güevu [dos persones], paecese permuncho [dos persones]. || Paecese como un güevu a una castaña, nun tener asemeyu [ente sí delles coses, delles persones]. || Poner el güevu, fam. esforciase o trabayar muncho [pa llograr daqué]. || Por güevos, fam. a la fuercia, inevitablemente. 2 Ensin nenguna xustificación. || Salir de los güevos [daqué a daquién], fam. apetecer por puru caprichu [daqué a daquién]. || Tocar los güevos, fam. molestar, cafiar [a daquién]. || Tocase los güevos, fam. folgar, tar ensin facer nada. 2 *Espresión que s’usa pa dicir a daquién que se fastidie, que s’aguante. || Un güevu, fam. muncha cantidá, muncho.