cuentu, el: sust. Rellatu [curtiu]. 2 Xéneru lliterariu de los rellatos curtios. 3 Llibru [nel que se cuenta una historia curtia]. Nun ruempas el cuentu. 4 Desaxeración [que se fai d’un dolor, del interés por daqué]. 5 Mentira [que se diz, que s’escribe]. 6 Comentariu [sobre un asuntu priváu que daquién fai pol gustu de falar de coses ayenes]. 7 Dichu o fechu [que nun tien interés, que nun tien importancia]. Déxate de cuentos y dime lo que quiero saber. 8 Presumiciu, intención de facer ver una cosa o coses que nun son verdá pa presumir. Los viaxes, les caceríes, les llacuaes too ye cuentu, queda en casa toles vacaciones. 9 Disimulu [interesosu col que s’escuenden les intenciones verdaderes]. 10 Conxuntu d’aiciones [pa combayar con otra persona]. 11 Facilidá [pa falar muncho y nun dicir nada]. Gasta un cuentu pa dicir les coses qu’aburre. 12 Contemplaciones [pa con daquién]. Nun críes con tantu cuentu al rapacín que me lu estroces. 13 Asuntu, cuestión. Esos son cuentos de mio y de naide más. Sácame siempre’l cuentu de la herencia. 14 Contu. 15 Cantidá [grande]. 16 fam. Menstruación. || A cuentu risa, con abondanza y con facilidá. Escribe poemes a cuentu risa. || Aplicar el cuentu, escarmar coles esperiencies ayenes. || Como cuentu (de) risa, con abondanza y con facilidá. 2 Ensin saber cómo. Apaeció como cuentu risa. || Cuentu la bona pipa, asuntu qu’enxamás nun s’acaba. || Echar cuentu a [daqué], desaxerar [daqué]. || Gastar cuentu, presumir. || Llevar cuentos, contar cuentos, bilordios. || Por cuentu, ensin facer apreciu de lo que diz una persona [oyer, escuchar]. || Tirar cuentu, presumir. || Tomar a cuentu risa, nun facer casu, nun dar importancia a [daqué o a daquién]. || Trayer a cuentu, falar de [daqué], mentar [daqué nuna conversación]. || Venir a cuentu, ser oportunu [un comentariu, un dichu]. Toes eses quexes nun vienen a cuentu agora. || Vivir del cuentu, vivir ensin trabayar.