cosa, la: sust. Oxetu o realidá [material]. 2 Realidá esistente de manera autónoma. Dios ta penriba de toles coses. 3 Realidá indeterminada, oxetu indetermináu. Mercó dalguna cosa. 4 Realidá inanimada, ser inanimáu. Persones, animales y coses. 5 Conxuntu de fechos, de circunstancies [que ta alredor de daqué o de daquién]. t. pl. 6 Fechu o trazu [que se resalta d’ente otros]. La cosa ye que-y tocó la llotería. La cosa ta en que saques les oposiciones. 7 Idea o materia [de la que se fala, s’escribe o se piensa]. Ocurriéronsemos delles coses pa facer esi llabor. Faló de munches coses, pero toes mui aburríes. 8 Xera o conxuntu de xeres que nun s’especifiquen. Fai dalguna cosa pa entretenete. 9 Llabor, trabayu [que tien d’encargase daquién]. Eso ye cosa to. 10 Manera de facer daqué carauterístico [de daquién]. t. pl. Les coses de Xacoba son toes asina. 11 Apasionamientu [que se tien por daqué o daquién]. ¡Tien una cosa polos gatos! 12 Sensación o impresión [molesta nel ánimu]. ¡Diome una cosa ver aquel muertu! || (A) cosa [d’un tiempu, d’una distancia], cerca, alredor [d’un tiempu, d’una distancia]. Coló va cosa d’una hora. || Como que nun quier la cosa, a poco y a poco y ensin alvertilo. 2 Con disimulu. || Como quien nun quier la cosa, a poco y a poco y ensin alvertilo. Como quien nun quier la cosa metímonos nuna deuda de tres millones. 2 Con disimulu. Agarrólu como quien nun quier la cosa y metiólu en bolsu. || Como si tala cosa, como si nun pasara nada. Reñen y a los dos minutos tán como si tala cosa. 2 Como si fuera fácil [facer daqué]. Esi fala de comprar negocios como si tala cosa. || Cosa nacida, daqué. 2 Nada. Nun quedó ellí cosa nacida. 3 Nadie. Equí nun vieno cosa nacida. || En cosa de, aproximadamente, alredor [d’un tiempu, d’una distancia]. || Nun ser cosa (de) que, nun ser que. Dame esi llapiceru nun seya cosa de que lu pierdas. || Nun ser cosa del otru xueves, nun valir muncho [daqué], nun ser estraordinariu. || O cosa asina, aproximadamente, daqué paecío. || Otra cosa, diferente dafechu. || Poca cosa, de pocu tamañu. Xuan ye poca cosa. 2 Poca cantidá. Bebió poca cosa. || Ser cosa de, llevar un tiempu de. La obra ye cosa de seis meses. 2 Precisar, necesitar. Ye cosa de seis o siete millones. 3 Ser necesario [facer daqué]. Va ser cosa de llevalu pa Les Arriondes. 4 Ser responsabilidá de. Facer la comida ye cosa d’él. || Tuertu pa cosa bona, de mala calaña [una persona]. || Vaya (una) cosa, *espresión que s’usa p’amosar que daqué nun tien muncha importancia, nin interés. || Xugar coles coses de comer, tratar imprudentemente con coses delicaes, que necesiten procuru.