casu, el: sust. Conxuntu de circunstancies [qu’arrodien a una persona, que constituyen un fechu]. Nesi casu val más que marches. 2 Realización [d’un fechu, d’una enfermedá nuna persona, nun fechu]. Hubo munchos casos de tuberculosis. Yá van tres casos d’inundaciones nun mes. 3 Cosa o fechu [que se presenta pa simplificar, pa exemplificar daqué]. 4 Asuntu [del que se fala, escribe o piensa]. Conté-y el casu pa ver si podía facer daqué. 5 Procesu [llegal que se tramita ante un xuez, ante un tribunal]. L’abogáu lleva tres casos a la vez. 6 Delitu [qu’investiga la policía]. 7 Tallu o paya [de la escanda]. 8 Variación [morfolóxica qu’en delles llingües adopta un nome o axetivu acordies cola función sintáutica qu’exerce na oración]. El llatín tien seis casos. || Al casu, oportunamente, convenientemente. Si vien al casu, fágolo. || Casu (de), de dase la circunstancia o circunstancies de que. Casu que vayas, avísame. || Casu perdíu, persona de mala conducta y que nun ye a ameyorala. || Cayer al casu, asoceder, pasar. || Dase’l casu, asoceder, pasar. || El casu ye que, *espresión que s’usa pa entamar una narración o daqué que se cuenta. || En (el) casu (de), de dase la circunstancia o circunstancies de que. En casu de que vayas, avísame. || En nengún casu, nunca, enxamás. || En tolos casos, siempre. || En tou casu, de cualquiera de les maneres, pase lo que pase. || Facer casu, atender [a lo que ta faciendo o diciendo daquién]. Nun fixisti casu a la esplicación y agora nun lo entiendes. 2 Obedecer, facer [lo que manda daquién]. Esti perru nunca fai casu a lo que-y mandamos. 3 Ocupase [d’una persona con atenciones]. Cuando taba mala facíenme más casu qu’agora. 4 Dar importancia [a lo que se diz, a lo que se fai]. Fai casu de tolo que-y dicen y dempués disgústase. || Foi casu que, *espresión que s’usa pa entamar un cuentu, una narración. || N’últimu casu, si fallen tolos recursos, toles previsiones. || Ser al casu, ser amañosu, conveniente. || Ser un casu, ser fuera de lo corriente.