mar, el/la: sust. Masa d’agua [salao que cubre parte de la Tierra]. 2 Porción xeográficamente reconocible de la masa d’agua [salao que cubre la Tierra]. El mar Cantábricu. 3 Costa, franxa de tierra [que ta al pie de la masa d’agua salao que cubre parte de la Tierra]. 4 [Gran] llanura [de color escuro de les que tien la Lluna na so superficie]. 5 Folaxe, movimientu [continuu y bravu de la masa d’agua salao que cubre la Tierra pola mor de la tempestá]. Hai mar. 6 Fola. 7 masc. Mayu [pa mayar trigu, centén]. || Alta mar, zona de la mar que ta lloñe de la costa y tien fondura abondo. || Araña de mar, Paromola cuvieri, crustaceu marín [de color encarnao y de pates mui llargues]. || Barbada de la mar, Phycis blennioides, pexe [de color amarelludo con dos ales en llombu y una barba debaxo la boca]. || Berberechu de la mar, Venus verrucosa, moluscu bivalvu [de cáscara engurriada asemeyáu al Cardium edule]. || Brazu de mar, entrante de mar na tierra. || Caballu de mar, Syngnathus acus, pexe [llargu y delgáu cola boca en forma de tubu]. 2 Nerophis ophidion, pexe [llargu y perdelgáu]. 3 Hippocampus hippocampus, pexe [de cabeza asemeyada a una caballería]. || Cabu de mar, Pachygrapsus marmoratus, crustaceu marín [de pates anches y color escuro, que cuerre mui rápido]. || Cantu (de) la mar, espeñaderu a la vera la mar. || Cantu de mar, corriente de mar que va hacia la tierra. || Chova (de) el mar, Vanellus vanellus, cigoreya, páxaru [de color blanco y negro con un moñín na cabeza, que llega en bálamos grandes coles ivernaes]. || Correa de la mar, [tipu de] ocle [estrecho y mariello]. || Culiebra de mar, Syngnathus acus, pexe [llargu y delgáu cola boca en forma de tubu]. 2 Nerophis ophidion, pexe [llargu y perdelgáu]. || Estrella de mar, animal marín [formáu d’un cuerpu central del que salen cinco o más piques mui delgaes y cubiertes de pinchos]. || Facese a la mar, entamar una navegación pela mar. || Golondrina de mar, Hydrobates pelagius, pexe [pequeñu mui escuru y que cría en cantil]. || Golpe de mar, fola [mui fuerte que ruempe contra un barcu, contra un cantil]. || Güeyu de mar, pozu d’agua [que se supón que comunica cola mar]. || La mar [de daqué], muncho [de daqué]. || Llobu de mar, foca, mamíferu marín de la familia Phocidae [que tien el cuerpu cubiertu de pelo mesto y les estremidaes en forma d’aleta]. 2 Marineru [vieyu y con muncha esperiencia]. || Mar abierta, zona de la mar que ta lloñe de cualquier costa. || Mar baxa, situación de la marea cuando ta nel puntu más baxu o cerca d’él. || Mar bella, mar sele, en calma. || Mar de fondu, vagamar. 2 Problemes atapecíos, que nun se ven de mano. || Mar de pie, situación de la mar cuando hai corrientes per baxo. || Mar llana, mar sele, en calma. || Mar que nun da vuelta, mar sele, en calma. || Ortiga de la mar, pexe marín del xéneru Torpedo [de cuerpu achapláu y arredondiáu, que da descargues llétriques]. || Osu de mar, Dromia personata, arañón, crustaceu [asemeyáu al centollu con munchu pelo y de color apardao]. || Patu de mar, patu [de color amarronao]. || Poner portielles a la mar, enfotase en facer daqué que ye imposible. || Ramu de mar, Eunicella verrucosa, celentereu [de color apardao que vive en colonies apegáu nos roncheles]. || Vaga (de) mar, movimientu internu [de la mar que produz xubíes y baxaes del agua]. || Tres marinos a la mar, xuegu [asemeyáu al esconderite].