vida, la: sust. Capacidá [d’un ser orgánicu] pa crecer, pa reproducise. Los vexetales tienen vida. 2 Esistencia de seres vivos. La bomba acabó cola vida nesa rexón. 3 Persona viva. Eso costó munches vides. 4 Espaciu de tiempu que va desque naz [daqué o daquién] hasta que muerre. Allargóse muncho la vida del home. 5 Manera de desarrollar el fechu d’esistir. Lleva una vida penosa. 6 Medios necesarios pa desarrollar el fechu d’esistir. La vida ta mui caro. Gana bien la vida. 7 Biografía, historia de lo que-y pasó a [daquién] dende’l nacimientu hasta la muerte. 8 Actividá [d’una persona, d’un pueblu, d’una institución]. 9 Cosa o persona [que fai más agradable o ameyora’l fechu d’esistir]. L’agua ye la vida pa les pataques. 10 Entendimientu, bona rellación [con daquién]. Nun tenemos vida con él. || Árbol de la vida, árbol del que, según la Biblia, nun dexó Dios comer el frutu. || Dar bona vida, tratar bien. || Dar la vida, asentar perbién, beneficiar [a daqué o a daquién]. Esti cafetín de pela mañana dame la vida. || Dar mala vida, tratar mal. || De tola vida, dende siempre, dende va munchu tiempu. || Dir la vida nello a [daquién], ser mui importante pa [daquién]. || En vida, viviendo, tando entá vivu. || Ente la vida y la muerte, a puntu de morrer, en peligru verdaderu de muerte. || Enterrase en vida, llevar una vida ensin coses prestoses, ensin ilusiones. || Facer por (la) vida, esforciase pa comer, pa movese, pa vivir. || Facer vida, llevase bien [con daquién]. || Facer vida de [daqué o daquién], llograr poner [daqué] o a [daquién] nes condiciones que se quieren. Nun faigo vida d’esta tela tan ruino. Nun fai vida del fíu. || La otra vida, esistencia del alma dempués de la muerte. || Llevar la vida, resignase, conformase. || Llevar vida [con daquién], rellacionase bien [con daquién]. || Llevar vida de [daqué o daquién], llograr poner [daqué] o a [daquién] nes condiciones que se quieren. || Muyer de mala vida, puta. || Na vida, nunca. || Nivel de vida, estáu de desarrollu al que llega la economía [d’una rexón, d’una persona]. || Pasar a meyor vida, fam. morrer. || Perder la vida, morrer [nun accidente, nuna batalla]. || Pola vida, muncho [prestar, saber, gustar]. || Secu en vida, perdelgáu, perflacu. || Tola vida, siempre. || Vida eterna, esistencia del alma [dempués de la muerte]. || Vida vuelta, vuelta [que se da apoyando la cabeza y les manes en suelu].