vara, la: sust. Palu [llargu y derechu que se saca d’una caña d’árbol, llimpiándola de fueyes]. 2 Piértigu [del carru]. 3 Cabezón [del carru]. 4 Palu [que se lleva nel llabiegu pa que nun se traviesen los tarrones de tierra]. 5 Pieza [allargada de madera del ramu o del llabiegu pa tirar d’ellos, pa guialos]. 6 Palu [vertical de los dos colos que se llevanta la maza pa echar a andar el mazu]. 7 Exa [del rodédanu]. 8 Palu [llargu onde se cuelguen los chorizos, les morcielles pa que curen]. 9 Cantidá [de chorizos, de morcielles que lleva un palu llargu de los que s’usen pa ponelos a curar]. 10 Palu [llargu y afitáu en suelu, alredor del que se pon la yerba almacenao, cuando nun se mete na tenada]. 11 Montón [grande y cónicu de yerba que se fai alredor d’un palu llargu y afitáu en suelu p’almacenar lo que nun se mete na tenada]. 12 Palu [llargu y cimble pa pescar que lleva nun cabu una tanza con anzuelu]. 13 Tallu [que medra ensin fueyes nel centru la planta y ye onde-y salen les flores]. 14 Carambiellu [del molín]. 15 Costiella, parte [de la gadaña opuesta al corte]. 16 Barra [de fierro del táladru]. 17 Parte [de la llegra que va metida dientro del mangu]. 18 Cuerda [que s’emplega p’atar d’atrás p’alantre la yerba nun carru]. 19 Midida [de llonxitú] qu’equival aproximadamente a ochenta y dos centímetros. 20 Barra [d’un ríu]. 21 Muérganu sexual [del güe]. 22 fam. Persona [alta y flaca]. || Como una vara, ensin movese, ensin gorgutar. || De vara prieta, de color escuro [una clas de mazana]. || Meter en vares a [daquién], axustar a unes normes el comportamientu de [daquién]. || Metese en camisa d’once vares, fam. participar nun asuntu complicáu, nuna discusión [que nun correspuende a ún]. || Punta (de) la vara, [tipu de] cacea [pa la pesca del bonitu]. || Rabuyeru de vara, aráu [pa llabrar terrenos duros que lleva un sechoriu o cuchiella llarga en vez de reya]. || Vara d’agua, agua qu’azota l’aire al llover. || Vara de faldes, palu [que se fai axuntando dos cañes y que s’emplega pa dimir la parte baxa d’una castañal]. || Vara de medios, palu [un poco más llargu que la vara de picu y daqué más curtia que la vara de faldes, que s’emplega pa dimir la parte que ta a media altura d’una castañal]. || Vara de picu, palu [que s’usa pa dimir la parte alta d’una castañal]. || Vara de raigañu, vara d’ablanu montés. || Vara (de) San Xosé, planta del xéneru Althoea [de tallu fuerte y flores blanques arrosaes]. 2 Solidago virgaurea, planta [de flores marielles]. || Vara de tazar, [tipu de] aráu [que s’usa pa romper la tierra enantes de llabralo]. || Vara de xusticia, fam. persona [llarga y flaca]. || Vara (de) yerba, montón [grande y cónicu de yerba que se fai alredor d’un palu llargu y afitáu en suelu p’almacenar lo que nun se mete na tenada]. || Vara vareta, vuelta [que se da apoyando la cabeza y les manes en suelu]. || Vara varica, vuelta [que se da apoyando la cabeza y les manes en suelu].