reló, el: sust. Aparatu [que mide’l tiempu y marca les hores]. 2 Aparatu [pa midir velocidaes, presiones, que marca los valores gracies a aguyes]. 3 Hoplostethus mediterraneus, pexe [de güeyos grandes, de color arroxao pelos costazos y platiao pela barriga]. 4 Pexe del xéneru Diplodus [de cuerpu achapláu y color platiao nos costaos]. || Como un reló, sanu, con bona salú. 2 Puntual, regular. || Contra reló, que tien como oxetivu durar el mínimu tiempu posible [una carrera]. || Pexe reló, pexerreló, [tipu de] pexe. || Reló d’agua, aparatu [pa midir el tiempu, sofitáu no que tarda un líquidu en pasar d’un recipiente a otru per un pasu perestrechu]. || Reló d’arena, aparatu [pa midir el tiempu, sofitáu no que tarda l’arena en pasar d’una parte a otra d’un recipiente per un pasu perestrechu]. || Reló de sable, aparatu [pa midir el tiempu, basáu no que tarda’l sable en pasar d’un recipiente a otru per un pasu perestrechu]. || Reló de Sol, aparatu [pa midir el tiempu sofitáu na inclinación y movimientu de la solombra d’un palu per una superficie].