quedar: v. Tar [nun sitiu de contino, per un tiempu indetermináu]. t. prnl. El llibru queda enriba la mesa. Esa casa queda cerca la mio. 2 Siguir tando [nun sitiu de contino, per un tiempu indetermináu]. Yo marcho; ¿tu quedes? 3 Tar [d’una manera, nun estáu de contino, per un tiempu indetermináu]. Queda fecho’l café. Xuan quedó plasmáu. 4 Dexar de tar nun estáu determináu pa tar [n’otru]. Daquella quedó viudu. Tantu plan quedó en nada. 5 Tener la propiedá de [daqué], la responsabilidá de [daquién]. t. prnl. Yo quedé cola casa y el mio hermanu cola tierruca. Decidióse que’l pá quedara colos fíos. 6 Ser necesariu [pa completar, pa facer daqué que nun se tien o nun se fixo]. Queden dos quilómetros pa la meta. Queda una selmana pa vacaciones. 7 Haber [entá daqué o persones]. Nun baxes a la panadería, que queda pan. Nun tranques la sala, que queden dos homes. 8 Ponese d’acuerdu pa [facer daqué], pa [vese nun sitiu]. Quedó en venir a les seis. Quedamos de facelo pal llunes. Quedé con él delantre la ilesia. 9 Facer tener [un corte de pelo, una prenda de vistir unes cualidaes que faen meyorar o afear l’aspeutu de la persona que la pon]. Esa falda queda bien. 10 Dexar escaecíu. Quedóme dicite que nun venía güei. 11 Pasar a tar na mente de [daquién un conocimientu]. Lo qu’esplicó güei quedóme bien. 12 Dar la impresión de ser [daqué]. Quedó como un sinvergüenza al dicir aquello. 13 prnl. Dormir, tar nun estáu de sueñu. El neñu quedóse. 14 prnl. Morrer, dexar de vivir. 15 prnl. Ser [la persona que busca a otres, que cuerre tres d’otres nun tipu de xuegu de neños]. 16 prnl. Dexar de falar. || Dexar quedar, nun molestar a [daquién], facer que [daquién] quede tranquilu. 2 Nun facer casu, nun tener en cuenta. 3 Retrasar [la solución d’un asuntu]. || Quedar a postoriu, quedar muertu. || Quedar afuera [un mes, un añu], pasar yá [un mes, un añu]. || Quedar bien, dar bona impresión [una persona al facer daqué]. || Quedar con carne nes uñes, fam. robar cuando s’alministra dineru ayeno. || Quedar d’una pieza, quedar ablucáu, plasmáu. || Quedar en cuayada, nun llegar a facese [daqué]. || Quedar fuera [un mes, un añu], pasar yá [un mes, un añu]. || Quedar mal, dar mala impresión [una persona al facer daqué]. || Quedar nel sitiu, fam. morrer. || Quedar nuna, tar d’acuerdu. || Quedar pata, fam. quedar iguales, quedar empataos. || Quedar solu [faciendo daqué], fam. ser mui bonu, mui amañosu [faciendo daqué]. || Quedar zapateru, nun facer nenguna baza [nel xuegu].