pica, la: sust. Parte [cabera y aguzada de daqué]. 2 Parte [superior del maíz que se corta en verde pa dar de comer al ganáu]. 3 Aperiu [que se compón d’un mangu y una pieza de fierro que tien per un cabu picu y pel otru una pieza plana con corte asemeyada a la fesoria]. 4 Ferramienta [que s’emplega na albañilería y que se compón d’un mangu y una cabeza que per un llau ye picuda y pel otru aseméyase a un hachu]. 5 Picu [pa picar la muela del molín]. 6 Yuncla [pa cabruñar]. 7 Pieza [d’una embarcación que va de proba a popa pencima del zapatón]. 8 Cantidá [pequeña de daqué]. Comió una pica namái. 9 Montón [de forma cónica que se fai na tierra coles cañes de maíz dempués de cortalo]. 10 Facina [de maíz, de forma cónica y coles plantes en vertical]. 11 Bollu [preñáu]. 12 Aguilandu, regalu [que se pide peles cases en Navidá]. 13 Xuegu de neños [que consiste en dir escorriendo a otru hasta tocalu]. 14 Pagellus erythrinus, pexe [asemeyáu al besugu, de cuerpu arredondiáu y color arrosao]. 15 Oblada melanura, pexe marín [de llombu azuláu y manches anegrataes]. 16 Pexe del xéneru Diplodus [de cuerpu achapláu y color platiao nos costaos]. || De pica, cola parte delgada o aguzada per delantre. || Facer pica, competir. || Pica abaxo, cola parte aguzada o delgada p’abaxo. || Pica arriba, cola parte aguzada o delgada p’arriba. || Pica la mula, xuegu de neños [que consiste en saltar unos penriba d’otros diciendo caún una frase].