nuedu, el: sust. Aición y efeutu de poner un cabu d’una cuerda, d’una cinta, d’un filu penriba y pembaxo [d’otru de manera qu’al tirar queden xuntos]. 2 Parte [onde s’axunten dos cabos d’una cuerda, d’una cinta, d’un filu puestos penriba y pembaxo ún del otru de manera qu’al tirar queden xuntos]. 3 Abultamientu [que sal nun tueru, na caña d’un árbol]. 4 Bultu [que se forma nos tendones, nos güesos al axuntase]. 5 Puntu [onde se crucien o d’onde arranquen delles coses]. 6 Parte [central d’una novela ente l’entamu y el desenllaz, onde los asocedíos se compliquen]. 7 Parte [central y esencial d’un asuntu]. 8 Unidá [de velocidá na navegación marítima, equivalente a una milla per hora]. || Nuedu de xente, cantidá [grande de persones] xuntes. || Nuedu na garganta, sensación d’emoción [que nun dexa falar].