muertu, -a, -o: ax. *Participiu de morrer. 2 Apagáu, poco vivu [un color]. 3 Con poca o nenguna actividá [un negociu, un sitiu]. 4 Que yá nun se fala [una llingua]. 5 Relaxada, ensin facer fuercia [una parte del cuerpu]. 6 Aformigada, ensin sensibilidá [una parte del cuerpu]. || A cuerpu muertu, ensin facer intentu d’apoyase, de protexese [cayer]. || A fueu muertu, pa nada, inútilmente. || A pesu muertu, ensin facer intentu d’apoyase, de protexese [cayer]. || Calzón d’ortiga muerta, Lamium maculatum, planta [con pintes blanques nes fueyes y flores de color rosa]. || Carnes muertes, texíu carnoso [que s’atopa ente la grasa del gochu]. || Marea muerta, movimientu de xuba poco intensu [que fai la mar]. || Muertu de [risa, fame], fam. con muncha [risa, fame]. || Nun tener ónde cayer muertu, fam. ser perprobe. || Muertu (de) fame, fam., persona qu’aparenta, pero tien poques riqueces. || Muertu (de) risa, que ri muncho. || Obra muerta, parte [del cascu d’una embarcación] que ta pencima de la llinia de cubierta. || Ortiga muerta, Lamium maculatum, planta [con pintes blanques nes fueyes y flores de color rosa]. || Puntu muertu, posición [de la palanca de cambios d’un coche que nun comunica nengún movimientu]. 2 Parada indefinida [nel desendolcu d’un procesu, d’un asuntu]. || Tiempu muertu, momentu [d’un procesu cuando nun hai actividá útil].