mano, la: sust. Parte [del cuerpu humanu onde acaba’l brazu y que se divide en delles partes allargaes y articulaes]. 2 Pata [de les dos d’alantre d’un animal]. 3 Parte [de les pates d’alantre d’un animal que va dende más abaxo de la rodiya hasta les uñes]. 4 Estaya, parte [na que se divide una tierra pa trabayala meyor]. 5 Llau, parte. A una mano taba la cocina y a otra’l cuartu. 6 Sitiu [dende onde se llanza la bola nun tipu de xuegu de bolos]. Llanza fuerte, que la mano ta lloñe. 7 Turnu [que se tien pa dar, pa tirar daqué nun xuegu]. Da, que tienes tu la mano. 8 Xuegu, partida. Xugamos una mano y colamos. 9 Cantidá [grande de daqué]. ¡Qué mano perres tien! 10 Capa [de daqué que s’esparde]. Esti cuartu necesita una mano de pintura. 11 Arte, habilidá [pa facer daqué]. Tien bona mano pa coser. 12 Mangu [d’una gadaña]. 13 Barrina [de les dos que nel reló indiquen los minutos, les hores o los segundos]. 14 Autor [d’una obra, d’un crime]. Estos cuadros tán fechos pola mesma mano. 15 Influyencia. Tien mano naquella empresa. 16 pl. Poder, facultá que tien daquién pa mandar, pa facer coses, p’autorizar]. El dineru quedó en manes del abogáu. El partíu ta en manes de los sindicalistes. || A entrambes manes, lo mesmo a un llau qu’al otru del xugu [una vaca]. 2 Lo mesmo con una mano que cola otra [trabayar, facer daqué]. La Palomba xúnzola a entrambes manes. || A la mano, con mamona [criar un xatu]. Hai que criar el xatu a la mano. 2 Ensin cría [dar la lleche una vaca]. || A mala mano, nun sitiu mal amañosu, a desamano. || A manes, adré, a queriendes. El catarru agarrástilu a manes. 2 En cantidá grande. Nevaba a manes. || A manes enllenes, en cantidá grande. Dieron carambelos a manes enllenes. || A mano, nun sitiu amañosu. Ye un sitiu mui guapu porque queda mui a mano de too. 2 Nun sitiu que s’algama cola mano. Pónmelo a mano, que nun tenga que xubir a la escalera. 3 Emplegando les manes, ensin ayuda de maquinaria. Esa tierra trabáyenla a mano. || A mano alzada, llevantando la mano [los miembros d’un aconceyamientu al votar]. || A mano armada, con armes [un robu]. 2 En pareya. || A mano enllena, en cantidá grande. Comieron fayueles a mano enllena. || A mano trocada, con arremangu, ensin contemplación [dicir daqué]. || A una mano, cola mesma planta semada [delles tierres]. || Abrir la mano, ser menos esixente. || Alzar la mano, pegar [a daquién]. Ten cuidáu qu’esti alza la mano fácil. 2 Ser menos esixente. Si queremos qu’apruebe dalguién hai qu’alzar la mano. || Apertar la mano, fam. atacañar. || Baxar la mano, ser menos esixente. || Botar una mano, ayudar. || Cargar la mano, pasase d’una midida, del puntu conveniente [al facer daqué]. Ta demasiao de dulce, cargasti la mano col azucre. || Chocar la mano a [daquién], apertar la mano de [una persona pa saludala, pa zarrar un tratu]. || Col corazón na mano, con sinceridá. Dígotelo col corazón na mano. || Coles manes en bolsu, fam. ensin trabayar, ensin facer nada. 2 Ensin dineru, ensin bienes. || Coles manes en senu, ensin nada. Vieno d’América coles manes en senu. || Coles manes na masa, faciendo daqué. || Coles manes vacíes, ensin nada. Pidieron muncho, pero llegaron coles manes vacíes. || Como la palma de la mano, mui llanu. 2 Mui bien [conocer un sitiu]. || Con una mano atrás y otra alantre, ensin nada. || Contar la mano, contar daqué que tenía que callase. || Contase colos deos de la mano, ser pocos, escasos en númberu. || Dar de mano, echar piensu al ganáu. || Dar la lleche a la mano, dexase catar [la vaca] anque nun tenga cría. || Dar la mano, apertar la mano de [otru pa saludalu, pa zarrar un tratu]. || De bona mano, bien, de bona manera. || De la mano [de daquién], al cargu [de daquién]. Eso queda de la to mano. || De la mano de Dios, ensin proteición, ensin amparu. || De la mano llarga, fam. dau a robar. 2 Dau a pegar. || De mano, en primer llugar. 2 Nun sitiu amañosu. 3 Que se pue llevar fácil na mano. || De mano en mano, circulando [daqué] d’unes persones a otres. || De mano purrida, apallabráu, zarráu [un tratu]. || De primera mano, nuevu. 2 Acabante apaecer. || De segunda mano, usáu. || D’entrambes manes, que s’arima siempre a onde más-y convién [una persona]. || Dir a les manes, engarriase. || Dise a les manes, engarriase. || Dise de les manes, quedar descontrolada [una situación]. || Dise la mano, pasase d’una midida, del puntu conveniente [al facer daqué]. || Echar les manes a la cabeza, sorprendese abondo. 2 Esmolecese muncho. || Echar mano a [daqué o a daquién], agarrar, coyer [daqué o a daquién]. Echa mano a la cartera y págalo too d’una vez. 2 Entamar [un trabayu]. || Echar mano [de daqué o daquién], valise [de daqué o de daquién]. Echen mano d’esi abogadín pa too. || Echar una mano, ayudar, dar ayuda [a daquién]. || En manes [de daquién], al cargu [de daquién]. Eso quedó en manes de to pá. || Escapase de les manes [daqué], quedar descontrolada [una situación]. || Esfregar les manes, amosar satisfaición por daqué que salió o va a salir bien. || Fuera (de) mano, nun sitiu poco amañosu. || Ganar pola mano, adelantase [a otra persona pa facer daqué]. || Llargu de mano, mui trabayador. 2 Que desenvuelve trabayu. || Llavase les manes, desabrise o desentendese de [un problema pa que lu igüen otros]. || Llegar a les manes, engarriase. || Llevantar la mano, pegar [a daquién]. 2 Ser menos esixente. || Llevar les manes a la cabeza, sorprendese abondo. || Mano a mano, xuntes [delles persones]. 2 Ún frente a otru [nel tratamientu d’un asuntu, nuna negociación]. || Mano blandia, falta de severidá. || Mano de santu, fam. remediu milagrosu. 2 Arte [pa facer les coses]. || Mano del semador, panoya que tien la forma asemeyada a una mano. || Mano derecha, habilidá, maña. 2 Collaborador más averáu y eficaz [de daquién]. || Mano d’obra, conxuntu de trabayos materiales [nun arreglu, nuna construcción, nun procesu de fabricación]. Pagó la mano d’obra al axustar la casa. 2 Conxuntu de trabayadores [que participen nun procesu de fabricación]. Ye más caro la mano d’obra que los materiales. || Mano dura, severidá. || Mano izquierda, habilidá, maña. || Mano llarga, fam. enclín a pegar, a robar. || Mano llixera, enclín a dar moquetones. || Mano sobre mano, ensin facer nada. || Mano suelta, fam. enclín a dar moquetones. || Meter mano a [daqué o a daquién], fam. empezar a trabayar, a arreglar [daqué]. 2 Tocar les partes íntimes de [daquién con intenciones sexuales]. 3 Castigar [a daquién aplicando la llei]. || Nun saber ónde se tien la mano derecha, nun conocer la realidá de la vida. 2 Tar desorientáu dafechu. 3 Ser tontu dafechu. || Pa la mano, con gana, con humor [pa facer daqué]. 2 A la derecha del que tira la bola [nel xuegu de los bolos]. 3 Enfiláu, borrachu. || Pasar la mano [a daquién], fam. afalagar [a daquién buscando’l porgüeyu]. || Pidir la mano, falar cola familia de [una novia pa que dea por bonu’l casamientu]. || Poner la mano en fueu, tar mui seguru de [daqué o daquién], responder [por daqué o daquién]. || Poner la mano enriba, pegar [a daquién]. || Poner les manes a Dios, axuntar les manes pa rezar. || Por mano [de daquién], al cargu [de daquién]. || Quitar de les manes [daqué], comprar muncho [daqué]. || Revolver la mano, dar un golpe, un moquetón. || Soltase la mano a daquién, *espresión que se diz cuando daquién pega fácil, rápido a otra persona. || Tener ente manes, tar ocupáu con [daqué]. || Tener la mano afuracada, fam. ser mui gastizu. || Tener les manes llibres, tener toles posibilidaes abiertes [pa entamar con daqué]. || Tener les manes llimpies, tar llibre [d’aiciones condenables, de delitos o crímenes]. || Tener les manes puerques, ser sospechosu o acusáu [d’aiciones condenables, de delitos o crímenes]. || Tener un furacu na mano, fam. ser mui gastizu. || Tomase la mano, tener la preocupación, la molestia [de facer daqué]. Entá nun se tomó la mano dir. || Trayer ente manes, tar preparando [daqué a escondíes]. 2 Tar ocupáu con [daqué].