andar: v. Movese [dando pasos]. Andresín yá anda. 2 Tar [per un llugar, per un país visitándolu, conociéndolu]. Estes vacaciones anduvo per Europa. 3 Ponese n’otru sitiu, n’otra posición [les coses inanimaes]. Anda la Lluna. 4 Funcionar [un mecanismu]. Esti reló yá nun anda. 5 Tar [faciendo daqué, d’una manera determinada, nun sitiu]. Ando bien de salú. Anda con mieu. Anda n’Uviéu. Los figos anden caros. Anda na tierra semando les pataques. Nun ta en casa, anda pa la tierra. 6 Tener el vezu de [dir], de [tar nun sitiu]. Daquella andaba muncho pequí. 7 Caciplar, revolver l’orde, la posición de los oxetos [al buscar, al fisgar]. Nun andes más ehí, que vas enredalo too. 8 Enredar [con un oxetu usándolu, masuñándolu, dándo-y vueltes]. Nun andes col ordenador que lu esgoncies. 9 Tar ocupáu en [daqué]. Anda a catar. 10 Buscar [el machu a la fema]. Esti gatu cuando anda a les gates enflaca muncho. 11 Ser mozu o amigu de [daquién]. Anda con Xuan. 12 Tar namoriscáu de [daquién]. Anda por Xuacu. 13 Trabayar [con daquién, con una empresa]. Anda con Ensidesa. 14 Sallar [una tierra, una planta]. Ta andando les pataques. 15 Avieyar. t. prnl. Un ándase muncho trabayando. A ellos véolos como siempre, paez que la única qu’ando soi yo. || Andalo, facer lo necesario pa llograr [daqué]. Andúvolo y consiguió la beca. || Andar a, buscar, guetar [castañes, niales]. || Andar a la foliquina, metese na mar pa xugar coles foles, cubriendo namái les piernes. || Andar a la gusmia, gusmiar. || Andar a la patalloria, fam. andar apuráu, con muncha priesa. || Andar a palos cola perra, fam. andar con priesa, apuráu. || Andar a pan y a naranxa, fam. nun tener dineru nin bienes. || Andar a puñaes col gatu, fam. vivir con pocos medios. || Andar a tiniebles, facer ruíu con palos el día de Xueves Santu al apagase la última vela que ta prendida [nuna ilesia]. || Andar al (mesmu) son, facer lo [qu’otra persona] quier. 2 Facer daqué acordies [dos persones]. || Andar al recovecu, tar remolón, poco dispuestu a [facer daqué]. || Andar al riegu, guiar la pareya pel riegu [al llabrar]. || Andar col cuerpu, pegar, dar golpes. || Andar col focicu [a daquién], fam. pegar, dar golpes [a daquién na cara]. || Andar cola Lluna, allunar, sufrir trestornos o camudamientos de personalidá atribuyíos a la Lluna. || Andar con [cuentos, mentires], contar [cuentos, mentires]. || Andar costaciegu, dedicase a negocios poco honraos. || Andar de política, fam. tar enfadaos [dos o más persones ente sí]. || Andar delantre, guiar diendo delantre la pareya pel riegu [al llabrar]. || Andar en lluello, andar [d’un llau pa otru] ensin facer nada. 2 Facer les coses ensin pensales, ensin un oxetivu claru]. || Andar en malos pasos, tar metíu n’asuntos poco llegales. || Andar escaxináu, madrugar muncho. 2 Entamar a querer facer coses propies d’una persona mayor. || Andar la gata en palombar, tar contenta [una persona]. || Andar los mures en caxón, fam. ruxir les tripes. 2 Haber fame. 3 Robar [coses de poca importancia, en poques cantidaes]. || Andar los ratos en caxón, fam. ruxir les tripes. 2 Haber fame. 3 Robar [coses de poca importancia, en poques cantidaes]. || Andar toles calostres, andar de casa en casa [restolando, enterándose de los asuntos ayenos]. || Andar tres [daqué] o de [daquién], facer lo necesario [pa consiguir daqué], a [daquién que se quier]. || Andase la cabeza [a ún], perdese momentáneamente la capacidá pa pensar. || D’andar per casa, que tien un usu domésticu. 2 De pocu valor, de poca trescendencia. || Echar a andar a [daquién], facer que [daquién] cole o salga [d’un sitiu], dexe [un puestu de trabayu]. Echélu a andar por vagu y contraté a otru más acionáu. || P’andar per casa, que tien un usu domésticu. 2 De pocu valor, de poca trescendencia.