llave, la: sust. Oxetu [de metal allargáu con muezques nun cabu, qu’encaxa nuna pesllera y val p’abrila y zarrala]. 2 Oxetu [allargáu de madera, de fierro, que s’emplega pa suxetar daqué]. 3 Pieza o mecanismu [que dexa abrir o zarrar daqué]. Llave de la lluz. Nun pudi atar el xatu porque perdí la llave de la collera. La llave del agua. Llave del salivu del molín. 4 Talerúa, pieza [del aráu qu’aúne’l dental a la llata y que val pa graduar la so inclinación]. 5 Pieza [de fierro que suxeta les trechories o la exa al muil del carru]. 6 Viga [central onde apoya’l puntal del cume del teitu]. 7 Maderu [grande de los que suxeten la pieza de madera qu’axusta’l fusu a la viga del llagar]. 8 Pieza [de madera cola que s’axusta’l fusu a la viga del llagar]. 9 Apilamientu [de pieces de madera que s’emplega na mina como rellenu pa reforzar una parte yá esplotada]. 10 Xuegu [que consiste n’aventar una pieza de fierro a una distancia aproximada de trece metros y facer que voltie una naspa metálica]. 11 Naspa [metálica qu’hai que voltiar con una pieza de fierro que s’aventa nun xuegu]. 12 Pieza [de les que, calcando colos deos, permiten abrir o zarrar el pasu del aire nos instrumentos musicales]. 13 Cosa [que dexa facer o llograr daqué]. La cultura ye la llave del éxitu. 14 Cosa [que da pasu a otra]. 15 Movimientu [que dexa inmóvil al contrariu nel yudu]. 16 Signu ortográficu [que se representa como «{» al entamu y «}» al final, y qu’inclúi una serie de términos que faen referencia a lo que se diz primero del signu o darréu d’él]. 17 Signu [matemáticu que se representa como «{» al entamu y «}» al final, onde s’escriben los elementos que formen un conxuntu]. || Ama de llaves, muyer [encargada de llevar una casa ayena]. || Como la llave l’horru, mui fríu, con munchu fríu. || Llave de pasu, mecanismu [que dexa abrir o zarrar una tubería d’agua, de gas]. || Llave inglesa, ferramienta [con mangu fuerte y cabeza regulable, que s’usa p’apertar o afloxar tuerques]. || Llave maestra, pieza [de metal que ye a abrir delles peslleres].