golpe, el: sust. Aición y efeutu de tocase de manera violenta [una cosa con otra, una persona con otra]. 2 Mancadura o abollón [que se produz al tocase de manera violenta una cosa con otra, una persona con otra]. 3 Movimientu [que se produz al dilatase y contrayese’l corazón alternativamente]. 4 Fechu, socesu [col que nun se contaba y que causa dañu, que fai sufrir]. 5 Apaición [repentina y curtia d’agua, de lluz, d’aire]. 6 Cantidá, parte [de daqué midible o d’un conxuntu d’unidaes contables]. Coyimos un golpe bonu de mazanes. 7 Dichu o fechu [inxeniosu y ocurrente]. || De golpe, d’una vez. 2 De sutrucu, ensin contar con [daqué]. || D’un golpe, d’una vez. || Golpe baxu, aición traicionera. || Golpe de gracia, puñetazu, tiru [col que s’acaba de matar a daquién]. 2 Fechu, socesu dolorosu [que llega dempués de munches desgracies, cuando yá nun se pue más]. || Golpe de mar, fola [mui fuerte que ruempe contra un barcu, contra un cantil]. || Golpe d’efeutu, aición o dichu [que produz l’almiración de los demás, que llama l’atención]. || Golpe d’estáu, asaltu al poder [d’un país soberanu per aciu de la fuercia]. || Nun dar golpe, fam. folganzaniar, nun trabayar [por falta de gana, porque nun apetez].