gallu, el: sust. Gallus gallus, ave [con una cresta colorada na cabeza que se cría p’aprovechar la carne]. 2 Gallus gallus machu. 3 Tetrao urogallus, ave [de color escuro y un rabu con pintes blanques qu’abre en forma d’abanicu]. 4 Moña o conxuntu [de plumes que tien una ave na parte d’arriba de la cabeza]. 5 Pexe del xéneru Lepidorhombus [de cuerpu arredondiáu y boca grande]. 6 Boya [que s’usa na pesca con abareque]. 7 Apareyu [que s’echa a la mar el primeru]. 8 Ramal [curtiu que sal d’una capa de carbón]. 9 Serapias lingua, planta [de flores coloraes clares y de fueyes llargues y estreches]. 10 pl. Linaria triornithophora, planta [coles flores de color rosa fuerte asemeyaes a paxarinos]. 11 pl. Planta montés del xéneru Rhinanthus. || Gallu la quintana, persona que llama l’atención, que destaca. 2 Persona que s’empondera a sí mesma faciendo de menos a los demás. 3 Persona que se fai la valiente faciendo de menos al otru. 4 Persona artera, arremangada [pa trabayar]. || Misa de (el) gallu, ceremonia relixosa eucarística [que se fai na nuechebona]. || Pata de gallu, Linaria triornitophora, planta [con flores de color rosa fuerte asemeyaes a paxarinos]. || Vuelta’l gallu, vuelta [que se da apoyando la cabeza y les manes en suelu].