agua, l’(a): sust. Líquidu [formao por hidróxenu y oxíxenu]. 2 Lloviu, líquidu [que cai al llover]. 3 Líquidu [de la fruta]. 4 Líquidu [de los güeyos, que pinga pela nariz pol fríu, pol catarru]. 5 Aguadiya, líquidu [que se forma nos granos, nes angüeñes]. 6 Superficie [per onde cuerre l’agua nel mesmu sen nun teyáu, nun monte]. || A agües vertientes, cola cayida del agua nun mesmu sen [los terrenos]. || Agua corriente, agua [que llega a los edificios peles cañeríes]. || Agua d’alicornia, agua [que s’emplega contra l’agüeyamientu, contra les picadures de culiebra]. || Agua (de) la colariza, agua [que queda dempués de colar la ropa]. || Agua del cuernu, agua [que s’emplega pa desagüeyar]. || Agua pesao, líquidu compuesto de oxíxenu y deuteriu, que s’emplega nos reactores nucleares pa controlar la velocidá de los neutrones. || Agües enllenes, mar llena. || Agües roxes, ácidu que xube a la boca cuando se tien l’estómagu revueltu. || Agües vertientes, agua [d’una lladera] que cuerre nun mesmu sen. 2 Cola cayida del agua nun mesmu sen [los terrenos]. Tien un prau agües vertientes pal Narcea. || Al agua, a beber [llevar, echar el ganáu]. || Cantu d’agua, zona [pequeña na mar, nun ríu]. || Capar l’agua, llanzar una piedra achaplada contra la superficie del agua de manera que dea botes. || Como dos gotes d’agua, mui asemeyaes [dos persones]. || Como l’agua nun cestu, mui inseguru y de pocu durar. || Como l’agua nuna cesta, mui inseguru y de pocu durar. || Correr l’agua, cambiar la direición del agua nes preses [al regar]. || D’agua, con munchu líquidu [una fruta]. 2 De munchu llover [un día, un tiempu]. || D’agües quebraes, con delles vertientes [un teyáu]. || Ducha d’agua frío, fam. deceición, desilusión. || Echar agua en (un) cestu rotu, trabayar en baldre. || Echar la burra al agua, fam. mexar [un home]. || Echar l’agua a [un prau], regar [un prau] abriendo les preses. || Facer la boca agua, facer naguar. || Facese la boca agua, entrar [a daquién] gana de [daqué]. || Flor del agua, agua primero [que se cueye na fonte la mañana de San Xuan]. || Galleta d’agua, recipiente [de madera, con un asa y un pitorru, que s’emplega pa echar agua]. || Güeyu d’agua, sitiu [onde naz una fonte, un ríu]. || Meter l’agua en casa, fam. facer perder en terrenu propiu. || Metese n’agua, llover muncho y bastante tiempu. || Pasar l’agua (pel cuernu), desagüeyar. || Páxara d’agua, Cinclus cinclus, páxaru de vezos acuáticos [que tien la pluma negro pel cuerpu y blanco pela pechuga y el pescuezu]. || Paxarón del agua, Jynx torquilla, páxaru migrador [de color pardo y de cantu paecíu a un quexíu llargu]. 2 Picus viridis, páxaru [de color verde con un picu fuerte col que pica’l tueru de los árboles]. || Pexe d’agua mala, Cetorhinus maximus, pexe escualu [de pelleyu gordo que tien un fégadu pergrande del que se saca aceite]. || Poner al pelo l’agua, enguadar, echar restos de pexe [a los pexes p’atrayelos y poder pescalos]. || Poner en pelo al agua, enguadar, echar restos de pexe [a los pexes p’atrayelos y poder pescalos]. || Reló d’agua, aparatu [pa midir el tiempu, sofitáu no que tarda un líquidu en pasar d’un recipiente a otru per un pasu perestrechu]. || Romper agües, romper la bolsa de líquidu amniótico. || Saltu d’agua, pantanu, embalse [grande d’agua]. || Si Dios tien agua, muncho, en cantidá grande [llover]. || Tomar les agües, dir a baños [a un balneariu]. || Tordu d’agua, Cinclus cinclus, páxaru de vezos acuáticos [que tien la pluma negro pel cuerpu y blanco pela pechuga y el pescuezu]. || Vara d’agua, agua qu’azota l’aire al llover.