corona, la: sust. Adornu [en forma d’aru que se pon enriba la cabeza como símbolu d’autoridá, d’un rei, de dignidá]. 2 Dignidá [de rei o emperador]. Isabel II perdió la corona tres la revolución. 3 Territoriu [gobernáu por un rei o un emperador]. Amplió la corona coles tierres americanes. 4 Monarquía, forma de gobiernu [na que’l poder cimeru tienlu un monarca]. 5 Parte [onde s’axunten la parte superior y posterior de la cabeza y onde naz el pelo en diferentes direiciones]. 6 Calvera [que sal onde s’axunten la parte superior y posterior de la cabeza y onde naz el pelo en diferentes direiciones]. 7 Pelo [que naz onde s’axunten la parte superior y posterior de la cabeza]. 8 Conxuntu [de flores y fueyes enramaes en forma de círculu]. 9 Conxuntu de clavos [que se meten nes cambes d’un carru pa protexeles]. 10 Cercu [lluminosu qu’arrodia al Sol o a la Lluna]. 11 Envolvedura [lluminosa del Sol, que forma parte de la so atmósfera]. 12 Pieza [del reló de pulsera o de bolsu cola que se da cuerda]. 13 Cercu [lluminosu qu’arrodia la cabeza de los santos]. 14 Parte [alta y arredondiada d’un monte]. 15 Tucu, parte [d’un árbol que queda llantada na tierra dempués de cortalu]. 16 Rama, conxuntu [de cañes que tien un árbol]. 17 Estremu [de la pataca onde nacen más guaños]. 18 Parte visible [de los dientes, de les mueles que sobresal de les enxives]. 19 Unidá monetaria [de dellos países]. 20 Parte [de la peonza per onde s’agarra pa facela dar vueltes]. 21 Techu [d’un travesal d’una mina]. 22 Estremu [d’un barrenu]. 23 Conxuntu [de barrenos que se ponen no cimero de la guía d’una galería minera]. 24 Conxuntu [de barrenos que formen un arcu en techu d’una galería d’una mina]. 25 Encetadura [de fogaza]. || Clavu de corona, pieza [de metal allargada y delgada, puntiada per un cabu y con cabeza muncho ancha pel otru, que s’emplega pa protexer el bandón de les ruedes]. || Hasta la corona, fartu, cansáu [de daqué o de daquién].