corazón, el: sust. aum. de corazu. 2 Coraza [grande]. 3 Muérganu [del aparatu circulatoriu que mueve’l sangre del cuerpu]. 4 Disposición d’ánimu [que fai querer, tener afeutu]. Ye una persona ensin corazón. 5 Parte central [de daqué]. 6 Llata [qu’aúne los forquetos del zarru d’una finca]. 7 Oxetu, figura [que tien forma asemeyada al muérganu central del aparatu circulatoriu]. 8 Carta [de les del palu de la baraxa francesa nel que se representen unes figures en forma de muérganu central del aparatu circulatoriu]. 9 pl. Palu [de la baraxa francesa nel que se representen unes figures en forma de muérganu central del aparatu circulatoriu]. || Abrir el corazón, amosar [daquién] los sentimientos [a los demás]. || Arrancar el corazón, producir muncha pena o dolor. || Col corazón (na mano), con sinceridá. Dígotelo col corazón na mano. || Col corazón nun puñu, angustiáu, acongoxáu. || Coyer el corazón nun puñu, fam. producir angustia, congoxa. || Dar (en) el corazón [a daquién], paecer [a daquién que daqué va a pasar]. Dame nel corazón que va venir. || De corazón, con sinceridá. 2 De bona gana y con afeutu. || Dolor de corazón, pena [fonda que se tien]. Da dolor de corazón ver esos neños pasando fame. || Facer de tripes corazón, esforciase [pa facer daqué que da repunu, ascu, que cuesta munchu trabayu]. || Flor del corazón, Hypericum perforatum, planta melecinable [de fueyes compuestes con pintes negres pel borde]. || Llegar al corazón, afeutar nel ánimu [daqué que se diz, que se fai]. || Partir el corazón [a daquién], producir muncha pena o dolor. || Picar Dios nel corazón [a daquién], facer bonu [a daquién]. || Romper el corazón [a daquién], producir muncha pena o dolor [a daquién]. || Salir del corazón [daqué a daquién], apetecer [facer daqué con sinceridá, de bona gana]. || Tener el corazón nun puñu, tar angustiáu, acongoxáu. || Tocar Dios nel corazón [a daquién], facer bonu [a daquién]. || Yerba (de) el corazón, Hypericum perforatum, planta melecinable [de fueyes compuestes con pintes negres pel borde].