cocu, el: sust. Paparraxu, inseutu o guxán [perpequeñu]. 2 Guxán, animal [pequeñu, invertebráu, col cuerpu blandiu y allargáu, formáu por aniellos y ensin pates que s’arrastra encoyendo y espurriendo’l cuerpu]. 3 Bichu [pequeñu que se cría nos alimentos]. 4 Bárabu, parásitu [que se cría debaxo’l pelleyu de los animales]. 5 Planta [de flores coloraes escures, de mal golor]. 6 Cocos nucifera, árbol tropical [de tueru perllargu, coles fueyes en forma de tires estreches]. 7 Frutu del Cocos nucifera, [que tien una cáscara peluda, mui dura y de color marrón]. 8 Personaxe imaxinariu [col que se mete medrana a los neños]. 9 fam. Persona [de cara mui fea]. 10 fam. Cabeza [d’una persona]. || Cocu cenón, cocu de lluz, inseutu coleópteru [que da lluz]. || Cocu (de) lluz, inseutu coleópteru [que da lluz]. || Cocu la vieya, merucu, guxán [que se cría ente la tierra llento]. || Cocu relluciente, cocu de lluz, inseutu coleópteru [que da lluz]. || Col cocu dientro, con pruyimientu, con esmolición. El médicu nun-y dixo lo que tenía y marchó col cocu dientro. || Fueu del cocu, cocucenandu. || Muil del cocu, Mugil auratus, pexe [allargáu de color gris escuro y barriga platiada]. || Tirar cocu, presumir.