cascu, el: sust. Cubierta [dura onde ta zarráu’l granu d’una ablana, d’una nuez, d’una pipa]. 2 Cubierta [dura de forma abovedada, espiral que protexe’l cuerpu de dellos moluscos, de dellos crustáceos]. 3 Cubierta [dura de los güevos que ponen les aves, los reptiles]. 4 Conxuntu de güesos [que protexen l’encéfalu]. 5 Capa [d’una cebolla]. 6 Recipiente de forma cilíndrica [que se carga con sustancies esplosives, con perdigones y se dispara con un arma de fueu]. 7 Pezuña, uña [de les pates de les caballeríes, de les vaques]. 8 Pipa o tonel [pa sidra]. 9 Pipa o tonel [pa sidra enllenu de daqué]. 10 Cantidá [de daqué que lleva una pipa o tonel pa sidra]. 11 Cachu [de vidru, de porzolana que queda de cascar o frañir]. 12 Vidru, sustancia [colo que se faen botelles, cristales]. Les botelles de cascu son meyores que les de plásticu. 13 Botella [onde vien envasao una bebida]. El cascu de la cerveza tienes que pagalu o devolvelu. 14 Cubrición [resistente que se pon na cabeza pa protexela cuando se trabaya, cuando se va en moto]. 15 Cuerpu [d’un barcu, d’un avión]. 16 Parte [d’una embarcación que va dende la llinia de cubierta hasta la quilla]. 17 Parte [d’una ciudá o población onde más se concentren les cases y les calles]. 18 fam. Testículu, glándula sexual masculina. 19 pl. Pareya d’auriculares [que s’axusten a les oreyes]. || Calentar los cascos [a daquién], facer que [daquién] se faiga munches ilusiones ensin sofitu. 2 Enfadar. 3 Alloriar. || Cascu azul, soldáu [del exércitu multinacional de la Organización de les Naciones Uníes]. || Dar colos cascos na ceniza, fam. fracasar dafechu, del too. || Enllenar la cabeza de cascos a [daquién], facer que [daquién] creya dalgo [afalagándolu, contándo-y mentires]. || Fuera (los) cascos, ensin tar enteráu, ensin tar al tanto de lo que se diz, de lo que pasa. || Llavar los cascos a [ún], afalagar, combayar con [ún]. || Llevantar de cascos, poner arguyosu, enchipáu. 2 Enfadar, enfocicar. || Llevantáu de cascos, con pocu xacíu, con poca formalidá. 2 Arguyosu, enchipáu. || Pexe de cascu, mariscu, animales marinos [col cuerpu protexíu por una cáscara dura].