carrera, la: sust. Aición y efeutu de dir [d’un sitiu a otru corriendo]. 2 Aición y efeutu d’entainar [nun trabayu, nun asuntu]. 3 Puxu [que s’agarra corriendo pa saltar meyor]. Agarró carrera y saltó ocho metros. 4 Competición [ente equipos, persones, animales pa percorrer una distancia nel menor tiempu posible]. 5 Sienda, camín [estrechu, malu]. 6 Marca [que queda nuna media, nuna chaqueta al soltase un puntu del texíu]. 7 Filera [que formen los granos nuna espiga]. 8 Viga [del telar que suxeta los llicios]. 9 Ringlera [d’un testu escritu imprentáu]. 10 Conxuntu d’estudios [que capaciten oficialmente pa exercer una profesión, que certifiquen unos conocimientos]. 11 Actividá [qu’una persona desarrolla de contino y na que va llogrando avances, méritos]. 12 Profesión [de funcionariu, de diplomáticu]. || A carrera tendida, rápido, muncho [correr]. 2 Rápido, apriesa [facer daqué]. || A la carrera, con muncha priesa. 2 Mui rápido, corriendo. || A (les) carreres, con muncha priesa. 2 Mui rápido, corriendo. || Carrera de relevos, carrera [dividida en tramos que cuerren dellos atletes que se van sustituyendo unos a otros]. || Carrera de Santiago, regueru de lluz [que traviesa’l cielu pela nueche], formáu poles estrelles de la nuestra galaxa. || Carrera’l señoritu, carrera [que se fai dar a ún llevándolu agarráu pela cintura del pantalón y tirando p’arriba de mou que se-y meta pel culu]. || Dar carrera [a daquién], poner [a daquién] n’estáu o disposición [pa facer daqué]. || D’una carrera, apriesa, rápido. || Facer carrera de [daquién], facer que [daquién] ameyore, prospere. 2 Ser quien a controlar a [daquién]. || Llevar carrera, tar actuando d’una manera determinada que dexa albidrar lo que va asoceder. Xuan lleva carrera de que lu echen del trabayu. 2 Tar d’una manera determinada que dexa albidrar lo que va asoceder. Lleva carrera de nun llover. 3 Ser a controlar a [daquién]. || Nin camín nin carrera, nada [conocer, saber]. || Nuna carrera, apriesa, rápido.