cantar: v. Emitir [les persones cola voz una secuencia de soníos musicales, harmónicos]. 2 Reproducir [cola voz una melodía musical]. 3 Emitir soníos más o menos harmónicos [les aves, los inseutos, les ballenes]. 4 Dicir [en voz alto daqué con entonación melódica]. Cantaron los númberos de la llotería. 5 Rinchar [la madera, la exa d’un carru al movese]. 6 Facer baza y dicir [que se tien una combinación que ta premiada o valorada con puntos en dalgunos xuegos de cartes]. 7 Llamar [a les abeyes repitiendo ciertes fórmules pa que posen nun sitiu]. 8 Lladrar [los perros nes caceríes cuando persiguen a la pieza]. 9 Facer ruíu carauterísticu [la mamposta al encaxar, los deos al restallar]. 10 Rinchar [el pollín]. 11 fam. Confesar [a la policía, a l’autoridá daqué que s’escondía]. || Cantar el cuquiellu, venir la suerte [a daquién]. || Cantar el ramu, cantar pa ofrecer el ramu [d’una fiesta al santu]. 2 Cantar villancicos [per nuechebona]. || Cantar la patorra, tener bon quiñón la pesca. || Cantar les cuarenta [a daquién], reñer [a daquién echándo-y en cara aiciones males que nun se puen negar]. || Cantar los oyíos, tener la sensación d’oyer runfíos dientro del oyíu, [dempués de llevar un golpe fuerte, cuando se tien una enfermedá]. || Cantar victoria, allabanciase de ser vencedor, de perfacer daqué. || Como si cantara un carru, *espresión que s’emplega p’amosar a daquién que nun se-y fai casu, que ye inútil que fale. || Coser y cantar, fácil, poco complicáu. || Hasta cantar el gochu, fam. hasta mui tarde [pela mañana]. || Hasta cantar la gocha, fam. hasta mui tarde [pela mañana]. Tuvo na cama hasta que cantó la gocha.