zarrar: v. Dexar ensin comunicación, ensin pasu, ensin rellación [a daquién o daqué y lo que queda fuera]. Zarró la casa pa tola temporada. Val más zarrar los güeyos y nun ver lo que pasa. Les autoridaes decidieron zarrar les fronteres. 2 Quedar ensin comunicación, ensin pasu, ensin rellación [daqué o daquién y lo que queda fuera]. t. prnl. Francia zarró cuando la guerra. 3 Mover [un caxón, una puerta, una ventana pa dexar ensin entrada o salida, pa quitar de la vista]. ¡A ver si zarramos les puertes! Zarrái les cortines, que yá ye tarde. 4 Completar [un círculu, un cuadráu, un circuitu llétricu, un corru]. Hai que zarrar esi redondel. 5 Arrodiar [un prau, una güerta con alambre, con varales pa dixebrala d’otro, pa protexela]. ¿Zarraríen yá esi monte los tos vecinos? 6 Volvese tupiu, mestu. Eses mates zarraron muncho. 7 Enllenase de nubes, ponese feu [el día, el tiempu]. t. prnl. Agora hai sol, pero al final va acabar zarrando’l día. Mira, zarróse’l día. 8 Ponese a [llover], a [nevar con más intensidá, de contino]. t. prnl. Nun pudi dir porque zarró a llover tola tarde. 9 Volvese perescura [la nueche]. La nueche zarró tanto que nun viemos gotera. 10 Facer que se pronuncie [un soníu] axuntando los muérganos articulatorios y estrechando’l pasu del aire. La u final zarra la vocal tónica. 11 Pronunciar [un soníu] axuntando los muérganos articulatorios y estrechando’l pasu del aire. Nesi conceyu zarren muncho les os. 12 Axuntar les partes de [un oxetu], de [una planta], de [un muérganu articuláu]. Zarra’l paragües, ho, que yá nun llueve. 13 Axuntar les sos partes [un oxetu, una planta, un muérganu articuláu]. t. prnl. Eses flores zarren pela nueche. 14 Axuntar los bordes de [una mancadura], de [una llaga]. Esta pomada zarróme les mancadures en seis díes. 15 Quedar colos bordes axuntaos [una mancadura, una llaga]. t. prnl. Muncho tardó en zarrar esa llaguina. 16 Desapaecer o facer desapaecer [un furacu, una resquiebra, una abertura]. Eses resquiebres zarren soles n’habiendo un poco d’humedá. Habrá que zarrar esi furacón con cementu. 17 Pegase a la parte interior de [una carretera], de [un camín al torcer nuna curva]. t. prnl. Nun zarres tanto nestes curves. 18 Facer estrechu o [más] estrechu [un ángulu, una curva, una trayeutoria]. Esta curva zarráronla tanto que ye un peligru. 19 Facese pronunciáu o más pronunciáu [un ángulu, una curva, una trayeutoria]. t. prnl. La curvona de la carretera zarra muncho pa la derecha. 20 Dexar d’atender al públicu [daquién], de tar abiertu [un comerciu, un almacén]. Estos díes los comercios zarren a les siete. ¿A qué hora zarres el chigre, ho? 21 Acabar cola actividá comercial, cultural [daquién, una organización, un comerciu]. Taresa hubo zarrar la zapatería de lo mal que-y diba. Colo mal que tán les coses munches empreses van tener que zarrar. 22 Apagar, facer que dexe de funcionar [un aparatu llétricu quitándo-y la corriente]. Voi zarrar la radio, que yá toi fartu de músiques. 23 Peracabar [un tratu, una negociación]. Tardaron bien en zarrar el tratu. 24 Poner fin a [daqué]. Zarró’l xuegu col orón. La televisión yá nun zarra la programación pela nueche. El diputáu zarró l’alderique con unes pallabres que naide entendió. 25 Completar el dentame [un animal, una persona]. La mio xata yá zarró. Yá-y zarró la dentadura. 26 prnl. Metese [en sí y nun amosar los sentimientos]. Desque morrió’l padre zarróse muncho en sí. 27 prnl. Ponese [nuna actitú intransixente ensin facer casu a razones, a opiniones]. Zarróse nello y nun fuimos quien a que mos fixere casu. || Zarrar con tarabica, fam. acabar la comida. || Zarrar de campiña, perder la gana comer [dafechu]. || Zarrar el güeyu, nun querer ver o entender. 2 fam. Morrer. || Zarrar la boca, callar, dexar de falar. 2 Facer que [daquién] dexe de falar. || Zarrar les pates, estrechase dafechu una capa carbón según s’avanza. 2 fam. Negase dafechu [a daqué]. || Zarrar les puertes, quitar les posibilidaes. || Zarrar los güeyos, nun querer ver o entender. 2 fam. Morrer. || Zarrar un prau, dar un paséu grande en redondo. || Zarrase en banda, ponese nuna actitú intransixente [ensin facer casu a razones, a opiniones].