voz, la: sust. Soníu [que se produz al vibrar les cuerdes vocales]. 2 Soníu [fuerte que se da pa llamar a daquién, pa reñer]. 3 Soníu [que sal d’un aparatu de radio, de televisión, d’un tocadiscos]. Quíta-y la voz a la tele. 4 Pallabra, espresión llingüística [con significáu que, xunto con otres, forma les oraciones]. 5 Persona [que canta nun conxuntu musical]. 6 Derechu a falar, a opinar [nuna xunta, nun aconceyamientu]. 7 Opinión [común nun grupu, nuna sociedá]. 8 Divulgu, noticia [que s’esparde ente la xente]. Óyese la voz de que Xuan va pa presidente. 9 Accidente gramatical [del verbu qu’espresa si’l suxetu ye activu o pasivu]. || A media voz, sele, suave [falar, dicir]. 2 De manera que los otros nun lo sientan del too, ensin munchu convencimientu. || A voces, con soníos fuertes [falar, llamar]. || Alzar la voz, falar [más] alto. 2 Falar [a una persona] nun tonu fuerte, mal educáu. || Correr la voz, esparder o espardese una noticia, un rumor. || Correse la voz, espardese una noticia, un rumor. || Dalo a voces, llorar, quexase con desesperu. || Dar una voz, llamar pegando una voz. Has dame una voz al pasar. 2 Reñer pocu tiempu y fuerte. Diéron-y una voz al neñu y quedó ablucáu. || Dar voces en castañéu, fam. falar ensin que naide faiga casu. || Dase a (les) voces, llorar, quexase con desesperu. || De viva voz, direutamente y con pallabres. || Echalo a voces, llorar o quexase con desesperu. || En voz alto, de manera que s’oiga bien. || Llevantar la voz, falar más alto. 2 Falar [a otra persona] nun tonu fuerte, mal educáu. || Llevar la voz cantante, tener la opinión [dientro d’un grupu a la que siempre se fai casu]. || Nun salir la voz del cuerpu a daquién, fam. *espresión que se diz cuando una persona fala mui suavino. || Pidir a voces [daqué], necesitar [daqué]. Esti neñu pide a voces unes bones nalgaes. || Voz cantante, persona [qu’opina, que dirixe un grupu coles sos opiniones]. 2 Opinión [dientro d’un grupu a la que siempre se fai casu]. || Voz de la conciencia, conxuntu d’idees, de sentimientos [que faen qu’una persona actúe d’una manera determinada].