volver: v. Dir [al sitiu, al puntu d’onde se salió]. t. prnl. Vuelvi llueu que yá ta la cena. 2 Dir [otra vegada a un sitiu onde yá se tuvo, a un asuntu que yá se trató]. Nun vuelvo más a esi hotel. Nun vuelvas al mesu discutiniu. 3 Facer [otra vegada l’aición] de [daqué]. Nun volvimos a comer fabes. 4 Facer agarrar a [daqué o a daquién carauterístiques nueves, idees nueves]. Asina vas volver tontu al neñu. 5 Poner [una cosa, a una persona del llau, de la cara contraria a la que ta]. Vuelvi la tortiella agora. 6 Cambiar de direición [un camín, un percorríu]. Nel cruz vuelvi a la derecha. 7 Devolver. L’espeyu vuelve la imaxe. Nun me volvió tovía’l llibru. El neñu volvió tolo que comió. 8 Mover [pa un llau o pa otru]. Volvió la cabeza. Vuelvi’l volante. Volvióse pa velu bien. 9 prnl. Agarrar [carauterístiques nueves, idees nueves]. De tanto pensar volvióse llocu. 10 prnl. Acometer [a daquién]. Al quita-y el balón l’otru neñu volvióse a él. 11 prnl. Ponese nuna actitú d’oposición [a otra persona]. Volvéivos a él y parái-y los pies. || Al volver, en viniendo, cuando venga. || De dir y volver, que permite dir [a un sitiu] y volver [un billete de tren, d’autobús]. || Volver a les andaes, tener [otra vegada] males costumes. || Volver a llamber el xatu, fam. amigase dos persones. || Volver a nacer, salvase d’un peligru grande. || Volver en sí, recordar, recobrar el conocimientu, la conciencia [otra vez dempués de perdela]. || Volver la bola, dar fuercia a [la bola pa que tire los bolos]. || Volver la cara, fam. pegar, dar golpes na cara. || Volver l’alma al cuerpu [a daquién], pasar [a daquién] un sustu, un enfadu. 2 Pasar una enfermedá [a daquién]. || Volver pola foz a casa, fam. volver a tratar daqué. || Volver pola pallabra, aporfiar [nun asuntu]. || Volvese atrás, dexar de facer una cosa que se tenía pensada, comprometida. || Volvese (en) cuayada, nun llegar a facese [daqué]. || Volvese en cuidos, pensar de contino en daqué. || Volvese la manta pelo [a daquién], fam. salir mal un plan, un proyeutu [a daquién]. || Volvese la manta pelos [a daquién], fam. salir mal un plan, un proyeutu [a daquién].