vista, la: sust. Sentíu que fai que’l güeyu perciba la lluz y los oxetos por aciu de la lluz. 2 Capacidá [pa percibir la lluz y los oxetos por aciu de la lluz]. 3 Llistura, astucia [pa dase cuenta de les coses más rápido qu’otros]. 4 Conxuntu de coses [que se ye a ver d’una vez dende un sitiu]. 5 Güeyos. Cuando-y lo dixi baxó la vista. 6 Representación [fotografiada, pintada d’un sitiu]. 7 Conxuntu d’aiciones [que fai un xuez nuna causa]. 8 Regalu [que se lleva a una muyer qu’acaba de tener un fíu, qu’acaba de casase]. t. pl. || A la vista, de manera que se ve. || A primera vista, viendo daqué o daquién per primer vegada. || A simple vista, aparentemente, n’apariencia. || A vista de páxaru, viendo daqué dende un sitiu altu. || Comer cola vista, desear muncho [una cosa, a una persona]. 2 Mirar muncho [daqué o a daquién]. || Con vista, con intención. || Curtiu de vista, fam. miope, que ve mal de lloñe. || De vista, sabiendo quién ye daquién pero ensin tener tratu. || Facer la vista gorda, facer como que nun s’entera [una persona] de daqué que tien que correxir. || Perder de vista [daqué] o a [daquién], dexar de saber de [daqué o daquién]. || Puntu de vista, manera d’entender, de ver [un asuntu]. || Vista curtia, fam. miopía. || Vista llarga, fam. hipermetropía.