sopa, la: sust. Comida [fecho cociendo ente caldu verdura, pastia]. 2 Fideos, tires [mui estreches y curties de pastia de fariña que se cuez ente caldu]. 3 Pedazu [finu y allargáu de pan, de xabón]. 4 Tayada [de pan tostada n’aceite, nel fueu]. 5 Saltu [de los que da una piedra achaplada que se llanza al agua]. 6 pl. Comida [fecho cociendo ente caldu, ente lleche pedazos pequeños y finos de pan]. || Comer la sopa boba, fam. vivir, comer a cuenta d’otru. || Comer les sopes [a ún], fam. crecer más que [ún]. 2 Apoderase de lo que correspondía [a otru]. || Como una sopa, mui [moyáu, empapáu d’agua]. || Dir de sopa, tar convidáu a comer un día de fiesta. || Facer sopes, llanzar al agua piedres achaplaes de manera que salten. || Ganar les sopes, acabar de trabayar una estaya primero que los demás. || Sopes de vaqueru, comida [fecho cociendo pedazos de pan con agua, grasa y pimientu].