saltu, el: sust. Aición y efeutu de saltar. 2 Espaciu [que se recuerre al saltar d’una vegada]. El saltu foi de dos metros. 3 Sitiu [pindiu con munchu desnivel per onde se baxa la madera, per onde se pasa]. 4 Sitiu [con munchu desnivel per onde cai un regatu d’agua, un ríu]. 5 Cantidá [grande d’agua d’un regatu, d’un ríu que cai per un desnivel]. 6 Xuegu de neños [que consiste en saltar penriba d’otru que ta agacháu]. 7 Avance [grande nun procesu, nuna serie d’acontecimientos]. La revolución francesa foi un gran saltu. || A saltos, en veces [facer daqué]. || Saltu d’agua, pantanu, embalse [grande d’agua]. || Saltu d’altura, prueba deportiva [que consiste en llograr una altura saltando penriba una marca]. || Saltu de llonxitú, prueba deportiva [que consiste en llograr una distancia saltando más allá d’una marca]. || Saltu la mula, xuegu de neños [que consiste en saltar penriba d’otru que ta agacháu]. || Saltu la pulga, vuelta [que se da apoyando la cabeza y les manes en suelu]. || Saltu mortal, vuelta sobre ún mesmu que se da nel aire al saltar.