salir: v. Dir [fuera d’un sitiu, d’un recipiente]. Sal del cuartu que te quiero dicir daqué. 2 Tener espaciu abondo [pa pasar pa fuera per un sitiu]. Esi armariu nun sal per esa puerta, hai que lu desmontar. 3 Dexar de tar en [una época concreta], en [una situación determinada]. Yá salimos del branu. Nun salimos de probes. 4 Acabar [una época concreta, una situación determinada]. Yá sal l’iviernu ensiguida. 5 Llegar, facer percorríu hasta [un sitiu determináu]. Esta carretera salía a La Collaona. 6 Entamar [a cantar, a xugar nun momentu determináu dientro d’una obra teatral, d’una pieza musical, d’un xuegu]. ¿Quién sal a cantar agora? Salió de bastos. 7 Tener [un resultáu determináu]. El xamón salió saláu. El neñu salió llistu. 8 Tener un resultáu correutu. La tarta salió. La cuenta salióme. 9 Falar, tener rellaciones amoroses. Salen dende hai un añu. 10 Alternar, rellacionase socialmente. Ye una persona de muncho salir. 11 Falar de [daqué colo que nun se contaba]. Salió con que nun quería facelo. 12 Ser l’escoyíu, el ganador [nuna votación, nun sortéu]. Salió Xuan de delegáu. 13 Tar [una cosa más arriba, más afuera que les que tien alredor, de la superficie que lu arrodia]. El tapón sal un poco. 14 Tener l’orixe en [daqué]. La lleche sal de la vaca. 15 Vendese [una mercancía]. Esti llibru salió perbién l’añu pasáu. 16 Facer un papel [nuna obra de teatru, nuna película]. 17 Publicase [una revista] o emitise [un programa de televisión un día determináu]. Esi programa que quies ver yá salió’l llunes. 18 Tar, apaecer [nuna publicación, nun programa de televisión]. El presidente saliera nel periódicu. 19 Xurdir, presentase [daqué colo que nun se contaba]. Yá-y salió trabayu. 20 Tener el preciu de [una cantidá]. Cada bolígrafu sal a quinientes pesetes. 21 Tocar a [una cantidá determinada]. Saldremos a mil pesetes caún. 22 Asemeyar [una persona a otra]. La neña salió al padre. 23 Ponese en celu [un animal]. La Mariella nun salió. 24 Defender a [daquién]. Siempre ta saliendo pol fíu. 25 Facese [con daqué faciendo valir la voluntá propia sobre la de los demás]. Esti neñu sal siempre colo que quier. 26 Desfacese, desaniciase [d’un animal, d’una planta]. Salió de les oveyes porque-y daben munchu trabayu. 27 Llegar [a una profesión determinada]. Salió a médicu. 28 Entamar a apaecer o a notase. La planta que semé hai poco nun va salir. Saliéron-y los dientinos. 29 Dexar dir fuera [el líquidu que contién un recipiente]. La botella sal l’agua. 30 Ocurrise a [ún]. Eso nun salió de min. 31 Venir [les pallabres cuando se quier dicir daqué]. Quiero esplicátelo y nun me sal. 32 Apaecer [un astru en cielu]. Yá salió’l Sol. 33 Escapar, marchar darréu [d’un sitiu]. Díxi-ylo y salió corriendo. 34 prnl. Florecer [les plantes enantes de tiempu]. || A la que salga, ensin saber. || A lo que salga, ensin saber. || Acabante salir del fornu, acabante facer [una obra, un productu]. || Entrar per un oyíu y salir pel otru, fam. nun importar nada un asuntu [a daquién]. || Entrar per una oreya y salir pela otra, fam. nun importar nada un asuntu [a daquién]. || Nun salir a llaurexu, nun prosperar, nun espoxigar [daqué]. || Nun salir la voz del cuerpu a daquién, fam. *espresión que s’usa cuando una persona fala mui suavino. || Salir a flote, salir a la superficie flotando llueu de tar dientro d’un líquidu. 2 Ameyorar una situación [económica, de salú]. || Salir a la lluz, publicase [un llibru, una noticia]. || Salir a la remisión, *espresión que se usa cuando se fai usu del derechu a quedase con daqué que se viende pol mesmu preciu que s’acordó con otru. || Salir a rellucir, ser tema [un asuntu, una persona nuna conversación]. || Salir caro, causar un perxuiciu, un dañu pergrande. 2 Necesitar [daqué] munchu esfuerciu [pa facese]. || Salir de cuentes, cumplir, pasar del día previstu pal partu. || Salir de les narices [daqué a daquién], fam. apetecer por puru caprichu [daqué a daquién]. || Salir de los coyones [daqué a daquién], fam. apetecer por puru caprichu [daqué a daquién]. || Salir de los güevos [daqué a daquién], fam. apetecer por puru caprichu [daqué a daquién]. || Salir de plazu, acabar, cumplise un plazu. || Salir del cascarón, nacer d’un güevu. 2 Espolletar, xorrecer. 3 Espabilar na vida [una persona moza, un rapaz]. || Salir del corazón [daqué a daquién], apetecer [facer daqué con sinceridá, de bona gana]. || Salir del guañu, espoxigar, crecer [una persona]. Tovía nun salió del guañu y yá quier cortexar. || Salir del riegu, tar fuera d’unes llendes determinaes de comportamientu. 2 Perder la calma, enfadase. || Salir del urdíu, medrar, espoxigar. 2 Perder la calma, enfadase. || Salir el tiru pela culata, *espresión que se diz cuando sal mal daqué. || Salir la perra mal capada, fam. *espresión que se diz cuando sal mal daqué. || Salir morica, fam. *espresión que se diz cuando sal mal daqué. || Salir (pa) alantre, ameyorar, espoxigar. 2 Tener éxitu [social, económicamente]. 3 Realizase [una idea, un proyeutu]. || Salir (pa) arriba, ameyorar, espoxigar. 2 Tener éxitu [social, económicamente]. 3 Realizase [una idea, un proyeutu]. || Salir perra daqué, fam. *espresión que se diz cuando sal mal daqué. || Salir rana daqué, fam. *espresión que se diz cuando sal mal daqué. 2 Defraudar [una persona a otra]. 3 Traicionar. || Salir torda daqué, fam. *espresión que se diz cuando sal mal daqué. || Salise de madre, albortar. 2 fam. Xordiar [muncho], andar [muncho] de folixa.