rei, el: sust. Home [qu’exerce de mou hereditariu’l poder cimeru nun estáu]. 2 Animal [que naz el primeru nun rebañu]. 3 Coccinella septempunctata, catasol, inseutu coleópteru [de llombu encarnáu con pintes prietes]. 4 Beryx decadactylus, pexe [de color encarnao enceso]. 5 Panoya [de maíz colos granos más escuros]. 6 Capellón, gaviella [de narbasu cola panoya, que se pon vertical na tierra pa facer una facina]. 7 Carta [de la baraxa que representa a un home que tien de mou hereditariu’l poder cimeru nun estáu]. 8 Pieza [del xuegu del axedrez que representa a una persona que tien de mou hereditariu’l poder cimeru nun estáu]. 9 fam. Home [que destaca dientro d’una actividá, dientro los miembros d’un grupu]. 10 pl. Fiesta del seis de xineru. 11 pl. Regalos [que se faen na fiesta del seis de xineru]. 12 fam. *Espresión vocativa que s’emplega pa dirixise cariñosamente a un neñu, a un home. || A cuerpu (de) rei, perbién, con munches atenciones, con munches comodidaes. || Carriquín del rei, constelación [del hemisferiu norte formada por siete estrelles asitiaes de manera qu’asemeyen un carru ensin ruedes y na que nun entra la Estrella Polar]. || Cestu de rei, cestu [grande con ases, de boca redonda y base rectangular]. || Cogollín del rei, Coccinella setempunctata, catasol, inseutu coleópteru [de llombu encarnáu con pintes prietes]. || Como un rei, perbién, con toles comodidaes [vivir, tratar a daquién]. || Como’l rei nun paxu, fam. cómodu, a gustu. 2 Ensin preocupaciones, contentu. || Como’l rei nuna tenada, fam. cómodu, a gustu. 2 Ensin preocupaciones, contentu. || Furtar tierra al rei, facer bien un negociu difícil. || Pexe rei, pexe del xéneru Beryx [de color encarnao enceso]. || Rei magu, rei de los tres qu’adoraron a Xesús dempués de nacer. || Rei moru, Lucanus cervus, vacalloria, inseutu coleópteru [prietu con cuatro ales, de boques fuertes y aforquetaes]. || Sirvir al rei, facer el serviciu militar obligatoriu. || Variquina del rei, postura [que s’agarra apoyando les manes o la cabeza en suelu y dexando les piernes alzaes]. || Zapatinos del rei, Lotus corniculatus, planta [de flores marielles que salen agrupaes].