raíz, la: sust. Parte [delgada y allargada de los árboles y de les plantes, que finca na tierra y ye per onde agarren les sustancies que necesiten pa vivir]. 2 Conxuntu de les partes [delgaes y allargaes de los árboles y de les plantes, que finquen na tierra y ye per onde agarren les sustancies que necesiten pa vivir]. 3 Parte [d’un pelu, d’un diente, d’un cuernu que se finca na carne, nun güesu y ye per onde se suxeta]. 4 Orixe, causa [de daqué]. 5 Parte [d’una pallabra que ye común a otres pallabres derivaes, compuestes de la mesma familia]. 6 Númberu [que, multiplicáu por sí mesmu tantes veces como marque un índiz, da otru númberu]. || De raíz, por completo, por entero. || Echar raíces, fincar a vivir [nun llugar que nun ye’l d’ún].