ríu, el: sust. Corriente [grande d’agua que cuerre d’un llau a otru per un calce]. 2 Calce [d’una corriente d’agua grande que cuerre d’un llau a otru]. 3 Cantidá [grande de xente, de ganáu, de coches que caminen pal mesmu sitiu]. || Andarina de ríu, Riparia riparia, páxaru [coles ales y el llombu escuros y la panza ablancazada, que vive nes veres de los ríos]. || Cangrexu de ríu, crustaceu de ríu, de los xéneros Astacus y Austropotamobius [de forma allargada y de color verdoso]. || Cayer el revólver al ríu, *espresión que se diz cuando daquién tien mala suerte, pierde daqué importante. || Como l’esguín del ríu, ensin nengún recursu, mui probe. || Como’l ríu pela oriella, fam. muncho [comer]. || Llevantar les piedres del ríu, fam. ser mui meticón, mui dau a metese n’asuntos ayenos. || Martín de ríu, Alcedo athis, páxaru [de rabu mui curtiu y picu llargu que tien la pluma de color azul verdoso y anaranxao]. || Nun llegar la sangre al ríu, fam. nun tener mayores consecuencies un conflictu, un problema. || Panadera del ríu, Motacilla cinerea, páxaru [pequeñu, de color gris penriba y mariello enceso pembaxo, de rabu llargu y prietu]. || Pioyina de ríu, Phylloscopus trochilus, páxaru [mui pequeñu de color apardao y cola pechuga más clara]. || Prau de ríu, prau que se riega. || Ratu (de) ríu, Galemys pyrenaicus, mamíferu insectívoru acuáticu [de color escuro, que tien el focicu mui espurríu y el rabu llargu]. || Sardina de ríu, pexe del xéneru Alosa [asemeyáu a la sardina, que vive na mar y torna al ríu pa poner la güévara]. || Soya de ríu, Platichthys flesus, pexe [de cuerpu arredondiáu, focicu puntiáu y de color averdosao con pintes anaranxaes]. || Trancha de ríu, pexe del xéneru Alosa [asemeyáu a la sardina que vive na mar y torna al ríu pa poner la güévara].