puntu, el: sust. Signu ortográficu «.» [circular y pequeñu que se pon al escribir enriba de delles lletres, pa marcar una pausa, p’acabar un párrafu]. Nun dexes de poner el puntu a la i. 2 Unidá [cola que se cuenten les xugaes feches nun xuegu, les preguntes acertaes nun esame]. Saqué venti puntos nesta partida. 3 Sitiu [concretu dientro d’una estensión espacial, d’un recintu]. Nun sé en qué puntu d’Europa ta esa ciudá. 4 Momentu [concretu del tiempu]. Dempués d’esi puntu entamó una época nueva. 5 Momentu [exautu cuando un procesu algama’l so meyor estáu]. Les fabes yá tán nel so puntu. 6 Estáu o situación [concreta onde ta un asuntu, una enfermedá]. La economía del país ta nun puntu perdifícil. 7 División [de les d’un escritu, d’una esposición que fai referencia a daqué concreto]. Estremó l’escritu en tres puntos. 8 Asuntu, tema [concretu que se trata nuna división de les que tien un escritu]. 9 Periodu de descansu [nun trabayu, nos estudios]. 10 Clas de texíu [que se fai con dos o cuatro aguyes llargues y una freba de llana, d’algodón]. Deprendióla so güela a facer puntu. 11 Atadura [de les que se van formando al texer llana, al facer ganchiyu]. Tienes qu’echar dalgún puntu más pa que nun-y quede estrecha la chaqueta. 12 Pasada [de les que se faen nuna mancadura abierta pa zarrala]. 13 Puntada, dolor [agudu]. 14 Aspeutu, parte [de daqué, de daquién]. El puntu débil d’esti ye’l mal caráuter. 15 Pinta o mancha [perpequeña]. Tienes un puntu en papu. 16 Puntal [d’una llave de contención na mina]. 17 fam. Persona ensin especificar quién. Vieno un puntu a preguntar por ti. || A puntu, dispuestu, preparáu. || Arcu de mediu puntu, construcción curva arquiteutónica en forma de media circunferencia. || Coche (de) puntu, taxi. || Con puntos y comes, exautamente, ensin añader nin quitar nada. || Dos puntos, signu ortográficu «» [emplegáu pa presentar una enumeración, una cita testual]. 2 Signu musical [qu’indica repetición del trozu anterior]. || En puntu, a la hora exauta. 2 Exauta [una hora]. || Poner puntu a [daqué], peracabar [daqué]. || Puntos suspensivos, signu ortográficu «...» [emplegáu pa indicar qu’una oración, qu’una enumeración queda ensin acabar]. || Puntu cardinal, sitiu nel espaciu [de los cuatro principales que marquen la orientación xeográfica]. || Puntu d’articulación, sitiu concretu de la boca [onde se fai l’estrechamientu necesariu pa producir un soníu del llinguaxe]. || Puntu (de) cruz, conxuntu de dos puntaes travesaes una pencima de la otra. Fai tres puntos cruz. || Puntu de fuga, sitiu exautu [onde s’axunten les llinies de perspeutiva nun dibuxu]. || Puntu (de) nieve, estáu [al que llega la clara del güevu al batelo muncho]. || Puntu de referencia, cosa o persona [qu’hai que ver o consultar p’atalantar les coses o les persones de la so mesma castra o especie]. || Puntu de vista, manera d’entender, de ver [un asuntu]. || Puntu final, signu ortográficu circular y pequeñu «.» [que marca’l final d’un escritu]. 2 Fin [de daqué]. || Puntu muertu, posición [de la palanca de cambios d’un coche, que nun comunica nengún movimientu]. 2 Parada indefinida [nel desendolcu d’un procesu, d’un asuntu]. || Puntu por puntu, con detalle. || Puntu siguíu, signu ortográficu circular y pequeñu «.» [que marca una pausa dientro un párrafu]. || Puntu (y) aparte, signu ortográficu circular y pequeñu «.» [que marca la pausa final d’un párrafu]. || Puntu y coma, signu ortográficu «;» [emplegáu pa marcar una pausa menor que la del puntu y mayor que la de la coma]. || Ser azucre en puntu, nun tener espera, ser impaciente. || Y puntu, *espresión que s’usa pa poner fin a daqué.