puerta, la: sust. Güecu [hasta baxo na parede d’un edificiu, nun armariu que val pa entrar o salir, pa meter y sacar coses]. 2 Pieza o pieces [que zarren hasta abaxo’l güecu que se dexa na parede d’un edificiu, nun armariu pa entrar o salir, pa meter y sacar coses]. 3 Entrada [d’una casa, d’un país]. 4 Portería [de fútbol]. || A les puertes de, cerca de, poco enantes d’entamar [daqué]. Tamos a les puertes de la seronda. || A puerta zarrada, d’una manera non pública. 2 Ensin nada. || A puertes, ensin facer nada. || Abrir les puertes, dar posibilidaes. || Agarrar la puerta, fam. marchar, colar d’un sitiu. || Cocer a la puerta’l fornu, fam. nun tener la capacidá, la intelixencia pa razonar bien. || Dar cola puerta en focicu, fam. refugar de males maneres [a una persona]. || Dar cola puerta na cara, fam. refugar de males maneres [a una persona]. || Dar cola puerta nes narices, fam. refugar de males maneres [a una persona]. || Dar cola puerta nos focicos, fam. refugar de males maneres [a una persona]. || En puertes, esperando preparáu pa facer daqué que va pasar llueu. || Facer en puerta, nun poder facer [daqué]. || Pasar el Sol per delantre la puerta, fam. pasar la mocedá [a una persona]. || Picar a toles puertes, pidir ayuda a toos. || Pie de puerta, pieza de les llaterales de la marcación d’una puerta. || Zarrar les puertes, quitar les posibilidaes.