pintar: v. Cubrir [con pintura]. Esti branu pinto la casa. 2 Facer [una figura o figures con colores]. Pinta un barcu nesi papel. 3 Arreglar [la cara con cosméticos, a daquién echándo-y cosméticos na cara]. 4 Resultar, dar [un resultáu bonu o malu]. Estos zapatos nun pintaron nada bien. 5 Tener bon resultáu. El cebollín esti añu pintó. 6 Venir bien o mal [daqué]. Pintó-y bien coyelo él. 7 Convenir, ser bono pa [daqué o daquién]. Píntate l’aire de Lleón. 8 Dase les circunstancies amañoses [pa daqué]. Si pinta voi a Les Arriondes güei. 9 Asoceder [por casualidá]. Pintó que la atopé ellí. 10 Tener una función determinada. Naquella empresa ¿él qué pinta? 11 Paecer, dar la sensación de [daqué]. Pinta que va llover. 12 Facer coses propies de [daquién]. Esta neña pinta’l diablu. 13 Amosar, dexar ver. Gracies que yá pinta na cara otru aldu. 14 Describir [una situación, un fechu]. Tu pínteslo perguapo, pero vamos ver en qué para. 15 Ser el trunfu [una carta, un palu nun xuegu de la baraxa]. Pinten bastos. 16 Poner de trunfu [un palu de la baraxa]. A ver si pintes oros, que tengo munchos nesti xuegu. 17 Apaecer, dexase ver. Pintó en casa cuando naide contaba con él. || Como Dios pintó a Perico, fam. evidente. || Pintar bastos, fam. presentase mal una situación.