pierna, la: sust. Estremidá inferior [de les dos que tien una persona]. 2 Parte [del cuerpu humanu que va dende’l cadril al pie]. 3 Pata [del corderu]. 4 Parte [del ramu, de la carriella que va enriba la calzadura]. 5 Filos [que nun tán perpendiculares nuna tela y que faen qu’al cortala nun salga cuadrada]. 6 Caña [d’un árbol, d’una planta]. || A pierna cacheta, sentáu con una pierna pa cada llau [nuna caballería]. 2 Coles piernes abiertes, cola mesma postura que se monta a caballu. 3 fam. Ensin esmolición, con toa tranquilidá. || A pierna escayada, sentáu con una pierna pa cada llau [nuna caballería]. 2 Coles piernes abiertes, cola mesma postura que se monta a caballu. || A pierna suelta, fam. ensin esmolición, con toa tranquilidá. || A piernes cachetes, sentáu con una pierna pa cada llau [nuna caballería]. 2 Coles piernes abiertes, cola mesma postura que se monta a caballu. || Carne pela pierna, fam. cosa perbona. || En pierna, ensin medies puestes. || En piernes, ensin medies puestes. || Enroscar el rabu ente les piernes, fam. despreocupase de daqué. 2 Acobardase, echase p’atrás [nun asuntu]. || Facer pierna, fam. dase importancia. || Meter la cabeza ente les piernes, fam. dexar d’intervenir en daqué [por vergüenza].