pescar: v. Agarrar o sacar [pexes o animales del mar, del ríu]. 2 Cazar [mures el gatu]. Esti gatu ye nuevu pero pesca. 3 fam. Detener a [un animal pa zarralu, a una persona pa metela presa]. Pescólu la policía yá en Portugal. 4 fam. Suxetar [daqué o a daquién cola mano, con un utensiliu]. Péscalu que nun escape. 5 fam. Facese con [daqué espurriendo’l brazu, cola ayuda d’otru oxetu]. Pescái esi vasu que ta enriba la mesa. 6 fam. Dexar suxetu [un deu, un pie con daqué de manera que lu manca]. Tengo’l deu encañáu porque lu pesqué cola puerta. 7 fam. Atayar, alcanzar. Pescóme en La Grandiella. 8 fam. Llevar per delantre, facer dañu [un coche, una caballería]. ¡Cuidáu, que te pesca’l coche! 9 fam. Escoyer [d’ente dellos oxetos, d’ente delles posibilidaes]. Pescaben cualquier cosa del comerciu y marchaben. 10 fam. Alcontrar a [daqué o daquién nun estáu determináu]. Pesqué la película empezada. 11 fam. Sorprender [a ún faciendo dalgo inconveniente, que nun quería que se supiese]. Pescaríalos bebiendo oruxu. 12 fam. Sorprender [a daquién l’agua, una noticia]. Pescómos un bastiu curiosu al venir. 13 fam. Llegar a tener [un enfile, una enfermedá]. Si ayeri pescó una talanquera, güei que nun se quexe. 14 fam. Afeutar, producir efeutu [una enfermedá, una calamidá, el sol]. Ta negru, pescólu bien el sol. 15 fam. Entender [idees, conceutos]. Da lo mesmo que-y lo espliques que non, nun pesca una. 16 fam. Recibir [la llonxitú d’onda d’una emisión, d’un programa, d’una cadena]. Hasta hai poco nun se pescaben toles cadenes de televisión. 17 fam. Coincidir [un fechu, una aición nun puntu del camín que s’anda]. Péscame de camín facete’l recáu. 18 fam. Tar asitiáu en [el camín]. El cine péscalu de la que va pa casa. 19 fam. Xubir, montar en [un tren], en [un avión]. Pesquémos el tren mui xusto. 20 fam. Llograr, facese con [daqué]. Pescó un bon negociu y quedóse ellí. || Nun pescar una, nun entender un res. || Pescala, enfilase. || Pescar a (el) deu, pescar con una tanza na mano. || Pescar el dos, marchar apriesa ensin avisar. || Pescar fañeques, fam. apigazar. || Rabu pescáu, fam. nada.