llinia, la: sust. Conxuntu [de puntos continuos que se dibuxen, que se marquen]. 2 Conxuntu [de coses o de persones puestes en filera]. 3 Mou [de ser, de facer daqué]. Esi diseñador tien una llinia clásica. 4 Percorríu [fixu que fai un serviciu d’autobús, de metro, de barcu]. 5 Autobús [que fai un percorríu fixu]. Agarra siempre la llinia pa dir a Uviéu. 6 Cuerda [de la peonza]. 7 Cuerda [con dellos anzuelos pa pescar]. 8 Comunicación [telefónica]. || Coche (de) llinia, autocar [que fai un percorríu fixu]. || En llinia, [ordenáu] de manera que ta una cosa tres d’otra, una persones tres d’otra. 2 Conectáu a una rede [de datos, de comunicación]. || Llinia de flotación, nivel máximu [que pue algamar l’agua nel cascu d’una embarcación]. || Llinia de rifu, pieza de la base del armazón [d’una embarcación]. || Pexe llinia, Gadus merlangus, pexe marín [de color pardo amarelludo y barriga blanca]. || Primera llinia, conxuntu de tropes [d’un exércitu que combaten más averaes al enemigu].