llevantar: v. Mover [daqué o daquién] p’arriba. Llevanta’l pie que me tas pisando. Llevantái l’ánimu. 2 Poner derechu, en posición vertical. Llevanta’l neñu, que cayó. 3 Tar [más] alto [daqué d’un llau que d’otru]. La pica’l zapatu llevanta un poco. 4 Facer que dexe de tar echáu en [la cama]. 5 Facer [un edificiu, una ponte, una muria]. 6 Midir [d’altu]. ¿Cuánto llevanta’l neñu? 7 Facer [montones de yerba]. 8 Recoyer, poner n’orde [daqué que taba espardío, desordenao]. Enantes de colar tengo que llevantar la cocina. 9 Dexar [un sitiu como taba enantes de facer daqué nél, de facer una actividá]. Agora tenemos que llevantar la era. Llevanta la tienda que colamos. 10 Ameyorar [el tiempu, el día cuando ta nublu]. Güei paez que yá nun llevanta. 11 Alicar [d’una malura, d’una murnia]. El probe nun llevanta del gripe que tuvo. 12 Romper, llabrar [una tierra la primera vegada]. 13 Calumniar, atribuyir [con mala intención a daquién un delitu, una falta que nun cometió]. 14 Quitar [un castigu, una multa]. 15 Desapegar, desaunir [daqué d’un sitiu]. La pintura yera malo, ta llevantando. 16 Llamar [a la xente pa la guerra, pal exércitu]. 17 fam. Ganar [dineru]. 18 prnl. Dexar de tar sentáu, echáu en [una siella], en [una cama]. 19 prnl. Rebelase, negase a obedecer a [una autoridá]. 20 prnl. Cociar, golpiar con [les pates d’atrás una caballería]. Ten cuidáu cola yegua, que se llevanta. 21 prnl. Entamar a haber [aire, fumu]. || Echame y llevántame, persona cola que se tien muncha confianza. David ye’l mio échame y llevántame. || Llevantar cabeza, salir [d’una situación abegosa o apurada, d’una enfermedá]. || Llevantar d’ancleta, tar sentáu sobre una nalga namái. 2 Dexar un sitiu, un trabayu antes del momentu establecíu o esperáu. || Llevantar de bancu, marchar, colar [d’un sitiu]. || Llevantar de cascos, poner arguyosu, enchipáu. 2 Enfadar, enfocicar. || Llevantar el cestu, marchar, colar [d’un sitiu]. 2 Dexar d’ayudar [a daquién]. || Llevantar (el) fabal, colar, marchar [d’un sitiu].|| Llevantar el pote, dexar d’ayudar [a daquién]. || Llevantar el prau, recoyer la yerba d’un prau. || Llevantar el vuelu, entamar a volar. 2 fam. Entamar a alicar [d’una malura, d’una esmolición]. 3 fam. Entamar a vivir por ún mesmu. || Llevantar la mano, pegar [a daquién]. 2 Ser menos esixente. || Llevantar la voz, falar más alto. 2 Falar [a otra persona] nun tonu fuerte, mal educáu. || Llevantar les pates, fam. marchar, colar [d’un sitiu]. 2 Rebelase [nun atendiendo a razones]. || Llevantar les piedres del ríu, fam. ser mui meticón, mui dau a metese n’asuntos ayenos. || Llevantar polvu, fam. armar griesca, xaréu. 2 Llevantar munchos comentarios [daqué]. || Llevantase col cofre y la media manta, apoderase de lo que se cuida, de lo que se tien emprestao. || Llevantase de la mesa, ponese de pie y marchar cuando se ta comiendo. || Llevantase de les pates d’atrás, fam. rebelase [nun atendiendo a razones]. || Llevantáu de cascos, con pocu xacíu, con poca formalidá. 2 Arguyosu, enchipáu. || Nun llevantar la cabeza de [un llibru], de [un documentu], estudiar muncho [un llibru, un documentu]. || Tener la cresta llevantada, ser mui presumíu, mui allabanciosu.