llegar: v. Pasar a tar en [un sitiu diferente al que se taba]. Llegó a Cuideiru a les tres. 2 Pasar a tar en [un momentu], en [una época llueu de pasar el tiempu, llueu de pasar per dificultaes]. Estes freses tán podres y nun lleguen a mañana. Cuando lleguemos al iviernu hai que podar. 3 Presentase [un momentu, una época al pasar el tiempu]. Xineru llega en pasando Navidá. 4 Presentase [daqué llueu de desendolcase nel tiempu delles condiciones]. ¿Cuándo llegará la paz? 5 Pasar a [tar nun estáu determináu, nunes condiciones determinaes]. Asina nun llegues a vieyu. Llegó a maestru. 6 Poner cerca o [más] cerca de [daqué o daquién]. Llégate p’acá que quiero vete bien. Llega la caxa que quiero ver lo qu’hai dientro. 7 Llevar [a daquién a un sitiu que ta cerca o lleva pocu tiempu dir]. Llégalu a so casa que ye tarde pa dir solu. 8 Ser a tocar en [un sitiu con un oxetu, con una parte del cuerpu]. ¿Llegues cola mano a la última estantería? 9 Completar la cantidá, el númberu de [daqué]. Nun llega al quilo. Esi llargueru llega a los dos metros. 10 Tener o ser bastante [pa daqué o daquién]. Nun sé si llegará con dos metros. A ver si con esto llegues a fin de mes. 11 Quedar [al altor d’otra cosa, d’otra persona]. Daquella la neña llegába-y pela cintura. 12 Estendese [daqué hasta un sitiu]. El camín llegará hasta so casa. 13 Realizar l’aición de [daqué dempués d’un procesu]. Llegaron a pegase. 14 prnl. Dir [a un sitiu que ta cerca o lleva pocu tiempu dir]. Llégate a so casa p’avisalu. || Llegar a figu maduru, fam. cumplise daqué que s’esperaba. || Llegar a les manes, engarriase. || Llegar a panizu maduro, fam. cumplise daqué que s’esperaba. || Llegar a pintoriu, fam. llograr el fin que tien [una persona, una cosa]. || Llegar a polleru, fam. llograr el fin que tien [una persona, una cosa]. 2 Madurar. || Llegar a tálamu, acabar, tener fin [daqué]. || Llegar al corazón, afeutar nel ánimu [daqué que se diz, que se fai]. || Llegar el (so) samartín [a daquién], fam. llegar [a daquién] el momentu de dar cuenta de lo fecho. || Llegar y besar el santu, fam. ser perfácil y rápidu de llograr. || Nun llegar a llaurexu, nun prosperar, nun espoxigar [daqué]. || Nun llegar a los calcañares a [daquién], ser de munchu menos valir que [otra persona o cosa]. || Nun llegar a los calcaños a [daquién], ser de munchu menos valir que [otra persona o cosa]. || Nun llegar la camisa al cuerpu [a daquién], entrar munchu mieu. || Nun llegar la pación a la barriga, fam. *espresión que se diz cuando daquién fai por aparentar más riqueces, más bienes de los que realmente tien. || Nun llegar la sangre al ríu, fam. nun tener mayores consecuencies un conflictu, un problema. || Tar llegáu a la razón, tener pocos medios.