focicu, el: sust. Parte [de la cara d’un animal onde tán les narices y la boca]. 2 Xestu [que se pon arredondiando y sacando los llabios cuando se ta enfadáu]. t. pl. 3 Barba, cazu. 4 fam. Cara [d’una persona]. 5 fam. Boca [d’una persona]. || Andar col focicu [a daquién], fam. pegar, dar golpes [a daquién na cara]. || Arimar el focicu, fam. caciplar, metese [n’asuntos ayenos]. || Cagar en focicu a [daquién], fam. burllase de [daquién de manera abondo ofensiva]. || Cuspir en focicu, fam. dicir [daqué] abiertamente, ensin miramientu. 2 Despreciar muncho. || Dar col focicu, fam. atopase de frente. 2 Tener dificultaes [pa llograr daqué poles torgues d’una persona, d’una situación]. || Dar cola puerta en focicu, fam. refugar de males maneres [a una persona]. || Dar cola puerta nos focicos, fam. refugar de males maneres [a una persona]. || Dar colos focicos, fam. atopase de frente. 2 Tener dificultaes [pa llograr daqué poles torgues d’una persona, d’una situación]. || Dar de focicos, fam. atopase de frente. 2 Tener dificultaes [pa llograr daqué poles torgues d’una persona, d’una situación]. Esi va dar de focicos conmigo. || Dar de focicu, fam. atopase de frente. 2 Tener dificultaes [pa llograr daqué poles torgues d’una persona, d’una situación]. || Dar en focicu [a daquién], fastidiar, facer de rabiar [a daquién]. || De focicos, cola cara per delantre. 2 Enfadáu, enfocicáu. || De focicu, cola cara per delantre. 2 Enfadáu, enfocicáu. || Meter el focicu, fam. caciplar, metese [n’asuntos ayenos]. || Torcer el focicu, enfadase, enfocicase. 2 Poner un xestu d’ascu, d’enfadu.