Resultaos

facer: v. Poner en bones condiciones d’usu. Fixi la cama bien ceo. Fixi’l café. 2 Dar esistencia a [daqué axuntando de manera ordenada les sos pieces]. Fixo una poesía guapa. Fízomos un armariu mui grande. 3 Sacar [d’una materia daqué con una forma propia]. Fixi una casa de papel. 4 Pasar a la realidá [una aición, un deséu que se piensa]. Pela tarde fadré’l trabayu. Fizo un viaxe a París. Dacuando facemos realidá los suaños. Ensiguida se fixo una bona fiesta. 5 Tener [una carauterística determinada, un trazu propiu]. La carretera fai curva al pasar per El Berrón. La tela fai visos. 6 Tener capacidá [un mueble, un cacíu]. Esti armariu nun fai nada. 7 Tar [el tiempu nunes condiciones determinaes]. Fai un día mui guapu. 8 Tener con [daquién una actitú determinada]. Fízo-y un despreciu mui grande. Fizo burlla d’él. 9 Emitir [un soníu]. ¿Cómo fai’l gatu? Esti coche fai munchu ruíu. 10 Mover [una cosa, una persona, un horariu pa qu’otra cosa, otra persona tenga sitiu, entre]. A estos llibros hai que face-yos sitiu equí. 11 Consiguir, llegar a tener [daqué]. Fixi amistá col primu. Fixi diez tantos. 12 Llograr que [daquién o daqué] tenga unes carauterístiques, un cargu que primero nun tenía. La pintura blanco fai’l cuartu más claru. La quiniela fízolu ricu. Ficiéronlu ministru. 13 Tresformar [una cosa] en [otra]. Fici la camisa trapos. 14 Ser la causa de que [daquién tenga una cualidá, un sentimientu]. La bebida fízolu desgraciáu. 15 Obligar a [daqué]. Fízolu venir a costafecha. 16 Tener l’actitú propia de [un tontu], de [un babayu]. Nun fagas el tontu. 17 Poner empeñu pa [daqué]. Fizo por venir llueu. 18 Alterar l’aspeutu, la forma de so con [daqué]. La tela fai arrugues. 19 Desfigurar, cambiar l’apariencia esterna [d’una manera determinada]. Esti espeyu faime más gorda. 20 Avezar, llograr que [daqué o daquién] tea a gustu en [una situación dempués d’un tiempu], que nun estrañe [un sabor dempués de probalo muncho]. t. prnl. Fizo’l cuerpu al fríu. Cola vida faise ún a too. Fíxolu a comer salao. 21 Atopar la solución de [un problema], de [una cuenta]. Nun marches d’equí hasta que nun fagas les cuentes. 22 Completar o llegar al final de [un periodu de tiempu]. Mañana fai un mes que nun la veo. 23 Trabayar [con una aguya y filo] entetexéndolo, dando puntaes en forma de naspa, de cadena p’adornar. Aprendióme a facer puntu. Gústame facer puntu cruz. 24 Agarrar [carauterístiques, idees nueves]. t. prnl. Esta neña fizo moza. Fíxose tontu. 25 Ser, completar [un conxuntu]. Cinco pesetes faen un duru. Toles parroquies faen un conceyu. 26 Criar. Fixo yerba esti prau. 27 Pasar la [nueche]. Fiximos nueche en Campumanes. 28 prnl. Tener [una idea, una noción de daqué]. Fáigome una idea de lo que pasó. 29 prnl. Ser pa [daquién un trabayu, una situación d’una manera determinada]. Fáiseme imposible que pasare eso. Fíxoseme llargu’l viaxe. 30 prnl. Intentar aparentar [daqué] que nun se ye. Faise’l tontu cuando quier. 31 prnl. Ponese [de nueche, de día]. N’iviernu faise de nueche llueu. || Dir (a) facer cuyares, fam. *espresión que se diz cuando una persona cafia o repuna muncho, pa que dexe tar tranquilu a ún. || Dir (a) facer gárgares, fam. fracasar [un negociu, un asuntu]. 2 *Espresión que se diz cuando una persona o cosa cafia o repuna muncho, pa que dexe tar tranquilu a ún. || Dir (a) facer llover, fam. *espresión que se diz cuando una persona cafia o repuna muncho, pa que dexe tar tranquilu a ún. || Facela (bona), pasar a la realidá una aición desagradable que causa perxuiciu [a daquién]. 2 Engañar [a daquién]. 3 Ganar [a daquién]. || Facelo, tener rellaciones sexuales. || Facer a porfía, cafiar, molestar. || Facer almanaques, facese ilusiones. || Facer altares, facer trastaes, travesures. 2 Facer suposiciones, albidros. 3 Facer coses estraordinaries, almirables. Ye llistu, pero tampoco fixo munchos altares. || Facer ánimes, marcar una merluza al sacala de la rede [pa cobrar dempués el beneficiu aparte]. || Facer beber per calabaza rota [a ún], fam. volver llocu. 2 Dar munchos disgustos, facer sufrir. || Facer boca, comer o beber daqué llixero [pa preparar l’estómagu pa la comida]. 2 Tomar daqué [pa rematar la comida a gustu]. || Facer boca con [daqué], comer o beber [daqué llixero pa preparar l’estómagu pa la comida]. 2 Tomar [daqué pa rematar la comida a gustu]. || Facer bon granu, formar burbuyes [la sidra al echalo]. || Facer bon mercáu, comprar o vender bien. || Facer bon paquete, poder envolvese bien [daqué]. || Facer (bones) mices, llevase bien [con daquién]. || Facer (bones) migues, llevase bien [con daquién]. || Facer bonu, xustificar. || Facer [brazu, pierna, músculu], fortalecer [un brazu, una pierna, un músculu con exerciciu físicu]. || Facer brixu [de daqué o daquién], ser quien a llograr dalgo [de daqué o daquién]. || Facer bultu, ocupar sitiu dando la impresión de [más] cantidá. || Facer calceta, texer, facer puntu. || Facer calendarios, facer proyeutos. || Facer camín, entamar daqué [solucionando les primeres torgues pa qu’otros sigan faciéndolo con más facilidá]. || Facer candelines [daqué a daquién], molestar muncho [daqué a daquién]. || Facer candelines los güeyos, brillar los güeyos. || Facer caniella, enrollar el filo nel carrete de [la máquina de coser], de [el telar]. || Facer cara [a ún], convidar [a daquién]. 2 Enfrentase [a daquién]. || Facer cargu, esmoler, dar pensión o esmolición. || Facer carrera de [daquién], facer que [daquién] ameyore, prospere. 2 Ser a controlar a [daquién]. || Facer casaéu, facer compaña [a daquién]. || Facer casu, atender [a lo que ta faciendo o diciendo daquién]. Nun fixisti casu a la esplicación y agora nun lo entiendes. 2 Obedecer, facer [lo que manda daquién]. Esti perru nunca fai casu a lo que-y mandamos. 3 Ocupase [d’una persona con atenciones]. Cuando taba mala facíenme más casu qu’agora. 4 Dar importancia [a lo que diz, a lo que se fai]. Fai casu de tolo que-y dicen y dempués disgústase. || Facer caxa, contar el dineru que gana [nun determináu momentu un negociu]. || Facer cayediza [una cosa], dexar cayer a queriendes [una cosa]. || Facer clas, asentar bien [una comida al cuerpu]. || Facer como les culiebres, asoleyase muncho. || Facer como [que se fai daqué], aparentar [daqué]. || Facer compases, tener muncha fame. || Facer comuña, tar conforme, tar acordies. || Facer corrada, preparar la era [pa la trilla]. || Facer correa, apellistrar, tar o tener el caldar crecíu [al tar pa parir una vaca]. || Facer corrina, ser cimble, poder espurrise [ensin romper]. 2 Espurrise [daqué]. || Facer corru, ser amigu de [daquién]. || Facer cosques, tocar [delles veces con daqué suave la planta los pies, debaxo los brazos, pa producir una sensación que da respigu, gana de rir]. || Facer cosquielles, tocar [delles veces con daqué suave la planta los pies, debaxo los brazos, pa producir una sensación que da respigu, gana de rir]. || Facer cuellu, tener pesu bastante [daquién pa ser amañosu p’agarrar en cuellu]. || Facer cuenta, valorar les ventayes y los inconvenientes. 2 Reflexonar, pensar [sobre un asuntu]. || Facer cuyarines, acabar cola paciencia de [una persona]. || Facer de, agarrar [carauterístiques, idees nueves]. Fizo d’asesín nesa película. || Facer de menos [a daquién], despreciar, tratar peor qu’a otru. || Facer de rabiar, enfadar [a daquién faciéndo-y burlla]. || Facer de tripes corazón, esforciase [pa facer daqué que da repunu, ascu, que cuesta munchu trabayu]. || Facer de vientre, cagar. || Facer del güeyu, guiñar el güeyu. || Facer dineru, ganar munchu dineru [por trabayu, por negocios]. || Facer d’oru, arriquecer. || Facer duxa [de daquién], facer burlla [de daquién]. || Facer el carbayín, ponese o andar [coles manes apoyaes en suelu y coles piernes espurríes p’arriba]. || Facer el cargu [a ún], dirixise específicamente [a una persona al tar falando con delles]. || Facer el culu cinco cinco, fam. entrar [a daquién] esmolición, pruyimientu grande. || Facer [el día, el mes], ganar el sueldu de [un día, un mes]. || Facer el fierro, trabayar el fierro. || Facer el muertu, flotar boca arriba [nel agua]. || Facer el quesu, fam. combayar. || Facer el xuegu a [daquién], sirvir a los intereses de [daquién]. || Facer en puerta, nun poder facer [daqué]. || Facer eses, caminar o rodar saliendo a un llau y a otru de la llinia reuta [un vehículu, una persona]. || Facer esquina, tar [nun sitiu] onde s’axunten dos fachaes, onde se corten dos calles [una tienda, un edificiu]. || Facer estomagada, enfadar, cabriar. || Facer falta, ser necesariu. || Facer frente, enfrentase. || Facer fumu, ser estraordinariu, fuera de lo común. || Facer furacos en cielu, querer facer o tener daqué difícil de llograr. || Facer galanes, ameyorar [una persona que ta mala]. || Facer galleta, causar un dañu, un resultáu desfavoratible. || Facer gayes, provocar [a daquién] coles coses poles que nagua. || Facer gracia, prestar, producir una sensación de satisfaición [daqué o daquién]. 2 Facer rir [daqué o daquién]. || Facer hores, trabayar [na mesma empresa fuera del tiempu normal]. || Facer la barba, tratar de llograr daqué con afalagos. || Facer la barba’l güeyu, fam. resfregar un home la cara [a un neñu] cola barba. || Facer la boca agua, facer naguar. || Facer la boca un flaire, *espresión cola que se da a entender que daquién pide demasiao. A esti rapacín paez que-y fixo la boca un flaire qué pidión ye. || Facer la braña, brañar. || Facer la cama, fam. preparar una traición, un engañu [a daquién]. 2 Molestar o fadiar [a daquién pa que marche]. || Facer la cruz, persignase. || Facer la farda, facer bien un negociu. || Facer la gallegada, armar xaréu [al baillar, al rir]. || Facer (la) goña, burllase. 2 Safase del trabayu. || Facer la llebre, faltar a la escuela ensin permisu [un escolín]. || Facer la madera, tresnar les pieces de madera [na mina]. || Facer la mona, facer el tontu. || Facer la pertegada, acabar un llabor. || Facer la puñeta, fam. fastidiar, poner torgues [a daquién nuna actividá]. || Facer la rosca, tener atenciones desaxeraes, contemplaciones pa [con daquién buscando’l porgüeyu propiu]. 2 Montar la escuela, nun dir a clas. 3 Buscar disculpes [pa nun trabayar]. 4 Cortexar. || Facer la rosca al diablu, engañar. || Facer la titiritona, aparentar que se ye inútil. || Facer la trocada, casase dos hermanos con dos hermanes. || Facer la vista gorda, facer como que nun s’entera [una persona] de daqué que tien que correxir. || Facer la ximuestra, aparentar que se trabaya. || Facer l’América, arriquecese. || Facer l’amor, tener rellaciones sexuales. || Facer les Amériques, arriquecese. || Facer les paces, apautar un tratáu [p’acabar una guerra]. 2 Volver a amigase [delles persones]. || Facer l’habana, arriquecese. || Facer lo que’l cuquiellu, falar ensin ser vista [una persona]. || Facer l’osu, facer el tontu. || Facer llunes, descansar, folgar el llunes. || Facer mal mercáu, comprar o vender mal. || Facer mal paquete, poder envolvese mal [daqué]. || Facer mala sangre, fam. enfadar, alteriar l’ánimu. || Facer manxar de [daquién], facer que [daquién] ameyore, prospere. || Facer más ruíu qu’un argayu, fam. falar muncho y atropellao. || Facer memoria, acordase de daqué. || Facer mientes, acordase. || Facer nueche, dormir [nun sitiu determináu]. || Facer oyíos de mercader, fam. nun querer enterase de [daqué]. || Facer palanca con [daqué], apoyar en [daqué pa mover fácil una cosa pesada]. || Facer pica, competir. || Facer pie, dar una persona bona impresión. 2 Asegurase. 3 Llegar colos pies al fondu de [un ríu], de [una piscina]. || Facer pierna, fam. dase importancia. || Facer piña, fam. llevase bien [dos o más persones]. || Facer platu [de daqué], falar muncho [de daqué] que nun tien importancia. || Facer pocu polvu, fam. tar pocu tiempu [nun sitiu]. || Facer por (la) vida, esforciase pa comer, pa movese, pa vivir. || Facer postura, poner arremangu, disposición. || Facer pupa, mancar [a daquién]. 2 Facer dañu moral [a daquién]. || Facer rabies, enfadar [a daquién] faciéndo-y burlla. || Facer ribera de [daquién], facer que [daquién] ameyore, prospere. || Facer sopes, llanzar al agua piedres achaplaes de manera que salten. || Facer sudar, ser difícil, costar trabayu. Estudiar esto fai sudar. || Facer tiempu, entretenese [hasta qu’asoceda daqué]. || Facer trices, estrozar [del too], estropiar [dafechu]. || Facer un aparte, formar un grupu [separándose de los otros]. || Facer (un) clavu, agarrar consistencia [l’argamasa colo que se rellena un bache]. || Facer un corte de manga [a daqué o a daquién], nun atender más [a daqué o a daquién que cafia, que molesta]. || Facer un cutu qu’escarabaya’l pelleyu, fam. facer permunchu fríu. || Facer un drama de [daqué], dar a [un fechu] más importancia de la que tien. || Facer un fríu que pinga’l mocu, fam. facer permunchu fríu. || Facer un mundu, desaxerar les consecuencies [d’un fechu, d’una situación mala]. || Facer un pan como unes hosties, fam. facer daqué permal. || Facer una traxedia de [daqué], dar a [un fechu] más importancia de la que tien. || Facer vida, llevase bien [con daquién]. || Facer vida de [daqué o daquién], llograr poner [daqué] o a [daquién] nes condiciones que se quieren. Nun fago vida d’esta tela tan ruino. Nun fai vida del fíu. || Facer xeitu, poner arremangu. || Facese a la mar, entamar una navegación pela mar. || Facese cargu [de daqué o de daquién], ocupase [de daqué o de daquién]. || Facese con [daqué], llograr [daqué]. || Facese de rogar, esperar a que se pida [daqué munches vegaes enantes d’aceptar]. || Facese de ruegues, esperar a que se pida [daqué munches vegaes enantes d’aceptar]. || Facese garabinos, ponese enchipada [una persona cuando la emponderen, cuando-y echen flores]. || Facese la boca agua, entrar [a daquién] gana de [daqué]. || Facese l’alcontradizu, facer por atopase [con daquién]. || Facese tarde, llegar a ser tarde [pa facer daqué]. || Mandar a facer cuyares, fam. *espresión que se diz cuando una persona cafia o repuna muncho, pa que dexe tar tranquilu a ún. || Mandar a facer gárgares, fam. acabar con [un trabayu] con [un negociu que diba bien]. 2 *Espresión que se diz cuando una persona o cosa cafia o repuna muncho, pa que dexe tar tranquilu a ún. || Mandar a facer llover, fam. *espresión que se diz cuando una persona cafia o repuna muncho, pa que dexe tar tranquilu a ún. || Nun facer visu, nun ser teníu en cuenta. || Unviar a facer cuyares, fam. *espresión que se diz cuando una persona cafia o repuna muncho, pa que dexe tar tranquilu a ún. || Unviar a facer gárgares, fam. acabar con [un trabayu] con [un negociu que diba bien]. 2 *Espresión que se diz cuando una persona o cosa cafia o repuna muncho, pa que dexe tar tranquilu a ún. || Unviar a facer llover, fam. *espresión que se diz cuando una persona cafia o repuna muncho, pa que dexe tar tranquilu a ún.