esparder: v. Tirar [coses que taben xuntes de manera que queden separaes caúna per un sitiu]. Espardió les fueyes per tola mesa. 2 Echar [una pastia per una superficie]. Esparder cementu. 3 Amenorgar [un dolor]. Cola aspirina espardió-y un poco’l dolor de cabeza. L’aspirina espardió-y el dolor de cabeza. 4 Facer que se sepa [un asuntu, una noticia cada vez ente más xente]. Espardió’l cuentu per tol conceyu. 5 Volver a tar nun estáu normal de salú al pasar [un enfile, un amoriu]. Nun s’atrevió a volver hasta que nun espardió la borrachera. 6 Descansar [del trabayu, de les moliciones]. Dexa de lleer y vete a esparder un poco. 7 Movese [d’un llau pa otru dando la impresión de que se trabaya muncho]. Nun espardas tanto p’acá y p’allá y acaba d’una vez de facer eso. 8 Hinchar o hinchase [daqué]. Mira como espardí’l globu. 9 Arreventar, españar. Espardió’l granu que tenía na cara. 10 Marafundiar, gastar [munchu dineru, munches riqueces de mala manera]. Esa muyer munches perres esparde. 11 Escamplar, abrir [el día, el tiempu]. 12 prnl. Sabese [cada vez ente más xente un asuntu, una noticia]. L’escándalu espardióse enantes de salir nos periódicos. 13 prnl. Quedar separao [daqué que taba xunto]. La yerba qu’atropasti espardióse pel prau. || Dir a espardela, fam. *espresión que se diz cuando una persona cafia o repuna muncho, pa que dexe tar tranquilu a ún. || Esparder el sueñu, quitar el sueñu [dormiendo un poco, tomando un café]. || Mandar a espardela, *espresión que se diz cuando una persona cafia o repuna muncho, pa que dexe tar tranquilu a ún.