entrar: v. Pasar [al interior de daqué]. Entra pa casa que ta frío. 2 Tener espaciu abondu [pa pasar per un sitiu, p’allugase nun espaciu, pa poner daqué nun llugar]. L’armariu nun entra pela puerta. 3 Pasar a tar [nuna estación, nuna época del añu, nuna etapa de la vida]. Yá entramos en xineru y tovía nun viemos el fríu. 4 Entamar [una estación, una época del añu, una etapa de la vida]. El ventiún d’avientu entra l’iviernu. 5 Entamar [a cantar, a actuar, a xugar nun momentu determináu dientro d’una obra, d’una pieza musical, nun xuegu]. Agora entra’l príncipe n’escena. 6 Entamar a ser [miembru d’una asociación, d’un conxuntu, estudiante d’una facultá]. Entren cien alumnos al añu en Medicina. 7 Tar [ente los que participen nun actu]. Xuan nun entró nel sortéu. 8 Falar o tratar de [un asuntu]. Nun quiero entrar en cuestiones morales. 9 Empezar a falar de [un asuntu] con [daquién de bones maneres pa llograr daqué]. 10 Empezar a sentir [una sensación, una enfermedá]. Entren calafríos sólo con pensar nello. 11 Empezar [a exercer un cargu, a mandar nun gobiernu, a trabayar nun sitiu]. Cuando entre’l gobiernu nuevu fadrá otra llei. 12 Empezar a criar [la poliya nun mueble, el pulgón nuna planta]. 13 Llabrar [una tierra per primer vegada]. 14 Facer una falta [un xugador a otru, emburriándolu o dándo-y una patada]. 15 Tener unes carauterístiques bones o males pa que [una persona aprienda una materia], pa que [apeteza comer una comida]. Les matemátiques nun m’entren. Entraba bien la sidra porque facía muncha calor. || Entrar en breda, empezar a actuar siguiendo unes normes de comportamientu. || Entrar en calor, calecer, entamar a sentir calor [dempués de pasar fríu]. || Entrar en fariña, entamar a falar, a tratar fondamente d’una materia, d’un asuntu. || Entrar en razón, ser razonable. || Entrar na cabeza, ser razonable, xustificable pa [daquién un dichu, un fechu, una actitú]. || Entrar pel aru, facer [a la fuercia] lo que nun se quier. || Entrar pel camín vieyu, fam. empapizar. || Entrar pel güeyu, gustar, convencer [una cosa, una persona]. || Entrar pelos güeyos, gustar, convencer [una cosa, una persona]. || Entrar per [daqué], aceptar daqué. 2 Aprender a facer daqué [dempués de prauticalo muncho]. || Entrar per un oyíu y salir pel otru, fam. nun importar nada un asuntu [a daquién]. || Entrar per una oreya y salir pela otra, fam. nun importar nada un asuntu [a daquién]. || Más gorda nun entra en prau, fam. *espresión que s’emplega cuando daqué causa plasmu, llama muncho l’atención.