enguedeyar: v. Desordenar, poner en males condiciones [al cruciase, anuedase o enroscase filo, llana, pelo]. El neñu enguedeyó tola llana por xugar cola madexa. 2 Confundir, entemecer [persones, coses de manera que nun s’estremen ente elles]. Punxi una seña a la to chaqueta pa que nun la enguedeyes con otres. 3 Facer [más] difícil o desordenáu [un asuntu]. Enguedeyaron tanto esi asuntu que yá nun tien igua. 4 Meter [nun asuntu difícil, complicáu]. Nun m’enguedeyes con esos compromisos que nun me toquen a mi. 5 Encismar, facer [lo posible pa que persones o animales s’enfaden, s’engarrien]. El que los enguedeya siempre ye l’hermanu. 6 Enredar, entretenese [corriendo, moviéndose, blincando]. Ta cansáu porque anduvo tola tarde enguedeyando per fuera. 7 Entretener, facer perder el tiempu [a daquién enllenándolu d’asuntos]. Nun pueo enguedeyame agora con eso que voi apuráu. 8 Confundir [a daquién contándo-y munches coses, dándo-y munchos datos]. Enguedeyólu con munches esplicaciones, pero nun arreglaron nada. 9 Enganchar [daqué nun ganchu, nuna pica]. Enguedeyé les medies nel borde l’asientu. 10 prnl. Entretenese, perder el tiempu. 11 prnl. Tener rellaciones amoroses o sexuales [con daquién]. Dicen qu’agora ta enguedeyáu con otra rapaza.